魚樂無窮：莎莎呈小雙底有睇頭 - 唐牛
■莎莎形成小雙底兼成功突破頸線，短炒目標可睇7.2元。
港股微升35點，細價股戰場卻血肉橫飛，十大跌幅榜中，創業板股份佔咗一半，兼且全部有成交，唔係乾跌格局，反映散水味濃。講埋身啲嘅，兩大馬雲概念股——文化中國(1060)及中信21(241)，前者一度插水逾一成，後者埋單亦跌7%，由此又衍生多一批蟹民，鎖死大量短炒資金，大市炒味越來越淡不無道理。
滬港通效應漸減，AH股差價炒風由燦爛歸於平淡，券商股亦只得零星炒作，港交所(388)則強勢畢呈，即市一度突破150元雙頂阻力，一旦成功突破，量度升幅可見200元！
證券商瑞銀日前發表報告，羅列一批受惠滬港通嘅股份，化妝品股莎莎(178)係其中一份子。老老實實，強國人嚟香港，莎莎係必遊景點之一，喺品牌效應下，得到內地股民歡心變得理所當然。莎莎最新公佈截至12月底止第三季營運數據，營業額按年增長14.8%，港澳同店銷售增長15.8%，每宗平均交易金額增長3.1%，已不及從前，今年新春首七天港澳整體及同店銷售更只得單位數增長。雖然高增長不在，但莎莎股價已有合理調整，彭博綜合券商預測，今年預測市盈率19倍，較過去三年平均24.7倍，折讓23%，現價息率回升至3.4厘，漸見防守力。睇圖表，莎莎日線圖形成小雙底，噚日成功突破頸線，可候回試6.6元吸納，短炒目標先睇7.2元。
唐牛
上一則: 炒友Blog：中興復蘇宜吼位買入 - 邱古奇
下一則: 股場放大鏡：動物保健品吸引力足 - 歐陽風
魚樂無窮 - 唐牛 舊文