金手指：14 = 07之二 - 孫柏文
■筆者上次講大陸信貸泡沫，與今次互聯互通的資金自由行吻合，散戶要多加留意。資料圖片
都冇一個月前，孫柏文寫咗篇題為「14大陸 = 07美國」嘅文，講因大陸信貸泡沫發展到呢個階段，畀我嘅感覺。當日，有個柱躉式fan屎透過facebook寫咗個message畀我話：「x你啦！如果今年係好似07年咁，資金自由行呢？食屎啦股棍！」
整多次資金自由行
點知，幾個禮拜後。哎呀！真係資金自由行。上禮拜四朝11點醒，都未起身，喺床邊攞部電話睇，就見話港交所(388)停牌話咩互通喎。咁我就諗：「頂！又來？上個禮拜先彈弓手放流料！」點知上facebook，就見Money Cafe個post，話財政司司長會講解。咁我就即刻諗：「Oh shit！今次係堅！」
咁喺上次港交所停牌彈弓手，我就曾見DBC同事棋亮喺停牌期間post咗五隻股票出來，話係AH互通嘅好股。我認識嘅棋亮，做事謹慎，揀股有紋有路，所以就file咗喺個腦裏面。所以一知係堅料後，就喺佢講嗰五隻中揀覺得最炒得起嗰隻，即浙江世寶(1057)，11點45分喺我facebook以「短炒red alert」建議買，當時係賣3.4元一股。
咁佢喺晏晝就一支箭咁升，到4.7元我又喺facebook叫人落車，之後佢升到5.8元。不過冇後悔，因呢隻A股喺深圳上市，互通冇份。
其實，如果從政策層面，今年整多一次資金自由行，完全符合我話07年同14年勁似嘅理論。
多唔使講，如果你知會有場信貸危機來緊，你要做嘅就係用股即刻集資。而如要用股換錢，就當然要整番場股市泡沫先有效啦！
我諗到呢度，亦答埋07年最大個謎，就係點解任總全力演出，曾俊華司長當年要入股港交所去為資金自由行做到好似好堅，唔通就係睇咗我當年啲文，為咗來緊場金融海嘯，鞏固定啲balance sheets先？
孫柏文
獨立股評人
http://facebook.com/shuen
本欄逢周二刊出
上一則: 青心直說：叫貨Van的藍海 - 胡孟青
下一則: 一周三件：宏華等肥豬肉 - 錢雋
金手指 - 孫柏文 舊文