魚樂無窮：映美三大賣點有排升 - 唐牛
港股跌逾200點，印證咗十個牛皮九個淡嘅講法。隔晚美國科技股做得唔錯，令雙馬概念股炒風再起。文化中國(1060)爆升24%，中信21(241)亦進賬一成。不過，以此作為大市翻生嘅指標，未免太一廂情願。事關昨日嘅炒作，似係炒鬼太餓股，有理冇理衝咗先講，先至做到由頭升到尾嘅效果。始終科網股蟹貨重重，要一舉破關談何容易。
莫耶斯終被炒魷，facebook洗版式新聞一浪接一浪。佢離開愛華頓轉投曼聯，最後卻要由天堂重返人間，其實同大小球會管理模式不盡相同有莫大關係。正如你玩開細價股，肯定對莊家層出不窮嘅手法瞭如指掌。點樣避地雷點樣搵大茶飯，外行人唔會知，但同樣投資心法卻難以套用於藍籌股。如今莫耶斯冇咗份工，如果胡亂玩股，冇咗嘅就會係真金白銀，同樣咁傷。
中線有權見2.5元
映美控股(2028)周二爆升一棍後，噚日稍為整固。公司擁有三大賣點，相信好快再踏升途。
賣點一，績佳息高。公司去年賺6,771萬銀人仔，按年增長近七成，全年派息達12.4仙，現價息率達6.3厘。賣點二，前景秀麗。國家「營改增」試點範圍逐漸擴大，映美主打嘅發票及票據打印機產品需求有增無減，嚟緊仲會向O2O及雲端平台發展，概念十足。賣點三，貨源歸邊。兩大股東共佔八成股權，意味街貨只得1億股或者更少，有心舞上話都冇咁易。等候回試1.8元水平吸納，中線有權見2.5元！
唐牛
上一則: 炒友Blog：東江估值平短炒佳品 - 邱古奇
下一則: 股場放大鏡：毅信疑似賣盤博得過 - 歐陽風
魚樂無窮 - 唐牛 舊文