陸羽仁 BLOG 2014年4月24日
超人墮地
2014/4/24 9:58:51
網誌分類: 經濟
睇蘋果電腦，睇到一個超人變番普通人的過程。
蘋果昨日公布季度業績，一切都ok。首季盈利每股11.62美元, 遠好過市場預期的10.18美元；營叢額456億美元，亦好過預期的435億美元。蘋果增加派息8%至每股3.29美元。蘋果又宣布6月9日開始1股拆成7股，變成每股75美元，拆細明顯係想股價低啲，多啲散戶可以買得到。
蘋果即將推出iPhone 6，分析原本預計iPhone 4的用戶會等iPhone 6，唔會買iPhones 5，但結果又唔係咁。蘋果期內售出4370萬隻iPhones同410萬部電腦，均好過預期的3845萬部及408萬部；不過iPad銷售就遠差過預期，只售出1635部，而預期係1980部。估計係市場上同類的平板電腦太多啦。分析普遍認為iPhones對蘋果較為重要，iPad只係次要產品，對蘋果的業績表示欣喜。
喬布斯一去，庫克接手做CEO，蘋果股票一度在2012年彈上702美元的高位，跟住下插。揸咗蘋果的億萬富豪Carl Icahn好勞嘈，叫庫克做嘢，產品唔得都增加派息和回購，搞好啲股價啦。蘋果就搞出所謂資本回報計劃(capital return program)，呢個計劃係包括增加派息和回購股份，定出至2015年底的花1000億美元回報股東的目標，昨日更表示要擴大至1300億美元。蘋果種種動作，主要目的係取悅投華爾街。Carl Icahn亦十分高興，蘋果股價今年亦從低位反彈30%，最近造524美元。
不過如果喬布斯還在，Carl Icahn喺度嘈，喬布斯會叫佢返屋企瞓覺，唔鐘意就唔該沽咗蘋果佢，唔歡迎你做股東。唔會有股東回報計劃，你等新產品啦。這是過去的蘋果，是一個壞孩子，如今變番乖仔，做番平凡人，咁就無出息啦。
蘋果電視根本唔得，手錶未有影，所謂大屏幕的iPhone 6今秋推出，唔知得唔得，蘋果睇住三星食曬自己的市場，無乜反應。如今平價又高能的手機開始食三星的市場，蘋果更加唔使反應。派吓息、回購吓、分拆吓，搞掂，變成一家失去夢想的巨企。
睇番少少美股。美國3月房地產及4月製造業數據唔靚仔，加上烏克蘭危機升溫，美股連升6日後，借勢調整。不過調整幅度溫和，市底硬淨，杜指微跌13點至16,502點，標普500指數跌4點，收報1875點；納指跌34點，造4127點。
繼上日公佈的3月成屋銷售連續三個月下滑，昨日公佈的3月新屋銷售年化月率暴跌14.5%至38.4萬戶，創去年7月以來最低水準，且遠低過市場預期的45萬戶。
誠如蘇格蘭皇家銀行證券駐美國經濟學家Guy Berger指出，美國的房地産市場到目前為，仍在復甦之中，但前路非常崎嶇，借貸成本的走高，再加上房價上漲，導致民衆購房的能力下滑，昨日公布的3月新屋平均銷售價格顯示，較去年同期攀升12.6%至歷史高位的29萬美元。雖然3月新屋銷售大幅走低，但當月的房屋供應卻依然維持強勁的漲勢。截至3月底，美國房地産市場的新屋供應量達到19.3萬戶，係2010年12月以來最高。買屋嘅人少咗，做按揭的人自然亦減少，美國最近一周的MBA地產按揭指標下跌3.3%，對上一周則係4.3%。疲軟的新屋銷售數據拖累地産建築商板塊，Lennar、Toll Brothers、Pultegroup股價向下。
美國樓市軟軟地，可以減緩通脹，放慢經濟，甚至推遲加息。
陸羽仁
回應(2) 我想回應
陸羽仁 BLOG 舊文