異動空間：新經濟藥股之選 - 魏力
新經濟股生猛番，瑞銀上周報告認為新經濟股已跌返落合理水平，要撈；舊經濟股增長弱雞，強國經濟數據差，企業賴賬事件料增，單位數PE都嫌貴，要沽。撈啲乜？報告建議買醫藥、汽車及科技設備股。魏力認為，去年業績塵埃落定，係龍係蛇一目瞭然，資金唔會再盲目炒憧憬，入市前先刨嚇公司盤數，待市況改善，盈利增長強嘅股份，如金山軟件(3888)、慧聰網(8292)等會率先受惠。
當然個市變得太快，假若fb及蘋果首季業績遜色，科網股隨時又洗倉。炒股短線睇氣氛，長線先睇盈利，一心買入想賺快錢，坐艇就話唔等錢使，擺埋一邊冇問題，賭仔心態──呢次輸運箒，就同隻股鬥長命，點都贏番先走！三年又三年，潛水十年嘅股份實在不少，止蝕只係輸錢，搵得番；唔止蝕係輸錢加時間，後者係搵唔番。
聯邦制藥(3933)去年純利大跌七成，僅賺4,800萬銀，但績後飆四成皆因業績似差實佳，撇除一次性項目，稅後溢利增2.8倍至4.02億元。高盛認為在胰島素及新產品推動下，今年盈利將顯著增長。以稅後溢利計，現價PE 22倍，藥股來講並唔貴，計埋增長潛力，以30倍PE計，可見7.4元。
魏力
http://www.facebook.com/2012jason
上一則: 何車500：海油化學候低買 - 何車
下一則: 青心直說：二師兄也腳軟 - 胡孟青
異動空間 - 魏力 舊文