一周三件：中國玻璃極抵買 - 錢雋
■筆者分析指，受惠國策及內地需求大，中國玻璃有運行。
內房限購令傳出鬆綁消息，內房股即彈，同房產有好直接關係嘅中國玻璃(3300)亦有反應，而玻璃股當中，中國玻璃亦最抵買，要搞。
中國玻璃係全國最大鍍膜玻璃生產商，頂頭對口係大孖沙聯想控股(992)揸26.6%，日本巨無霸行家Nexon(市值303億港銀，係中國玻璃21倍)亦揸咗中國玻璃25.17%。又全球可以生產低幅射鍍膜(LOW-E)同透明鍍膜(TCO)特種玻璃，得三間咁大把，中國玻璃係其中之一。講規模、技術、股東背景，中國玻璃威到盡！
近年市場競爭再加執到正環保標準，落後玻璃企業被淘汰，新增供應明顯回落。而隨住阿爺搞城鎮化，同推進建築節能標準，中國玻璃亦預期，需求有「良好」嘅上升空間。
專業估計，今年環球玻璃幕牆曬士超過1,600億銀(人仔．下同)，祖國佔四分之一。又實行多時嘅限購令，搞到內房嗌曬救命，阿爺唔放，個波爆咗仲大劑。所以，限購令適度調整，係遲早嘅既事，中國玻璃有運行。
1倍PB做目標要升九成
中國玻璃由2012年度見紅1.7億銀，到上年大幅轉盈8,165萬銀。若果以上、下半年比較，上年下半年純利6,854萬銀，比上半年1,311萬銀，一支箭飆升咗5倍，靚仔到爆！專業估計，中國玻璃今年EPS幾乎再翻一番，PE由家陣14.7倍，跌到得番7.5倍。
又中國玻璃近三年大跌78%，現價(0.99港元)PB得0.5倍。行家信義玻璃(868)1.7倍PB，預測8.5倍PE，冇PE 嘅洛陽玻璃(1108)，PB高達27倍！中國玻璃平靚正，升90%到1.9元，PB先得1倍，仲未追到行家，相對2011年4.82元高位，仲係潛水60%。
錢雋
細價股專家
本欄逢周二、三、五刊出
上一則: 金手指：四班車都上唔到 - 孫柏文
下一則: 板塊尋寶：小米關照通達翻半番 - 王昇
一周三件 - 錢雋 舊文