魚樂無窮：家家有個難炒的股市 - 唐牛
■中央力撐新能源車，有份為寶馬i3電動車供應EPS系統嘅耐世特相信會受惠於國策。圖為耐世特主席趙桂斌。資料圖片
港股噚日成交不足400億銀，創近一年低，進入塘水滾塘魚mode。話個市唔得咩？恒指又繼續喺23000大關徘徊，唔肯回頭。話個股唔得咩？阿爺keep住有國策出，噚日輪到習近平力撐新能源車，結果開足turbo向前衝。呢啲市況最蝦人玩，弱又弱唔曬，亂衝隨時出事，買入長揸又錯過咗最佳時機，認真左右做人難。
你話港股難玩，內地股神林園話A股仲大鑊！佢噚日接受電視訪問，話A股由2007年6000點跌番落去2000點，跌到係人都驚，仲話好多A股老散，連電腦都唔想開，跌就由得佢跌，心灰意冷程度可想而知。林園自己亦有損傷，身家蒸發三成，以佢嘅財富計，絕對唔係少數。不過，佢就話自己會繼續搵投資機會，更指A股已經好抵買，冇理由而家走去賤賣股份。
耐世特睇5.5元
林園呢種堅毅投資精神，值得大家學習，不過，要成功肯定唔係易事，因為呢個時候最容易磨蝕信心同意志，手順風可以贏粒糖，衰喺上嚟就可以鋪鋪輸。唔想本錢越嚟越少，第時冇子彈撈貨，選擇暫時離開股市，都不失為一個好方法，將原本平時搏殺嘅時間，改為上網睇新聞、刨業績，將來大市重拾朝氣，出手都可以快人一步。記住，機會永遠係留畀有準備嘅人的！
異動股方面，阿爺撐新能源車，有份為寶馬i3電動車供應EPS系統嘅耐世特(1316)，單日搶高半成，成功突破下降軌，下個目標可睇5.5元。
唐牛
上一則: 炒友Blog：海油服務績優分段吸 - 邱古奇
下一則: 股場放大鏡：中軟估值平可追落後 - 歐陽風
魚樂無窮 - 唐牛 舊文