金融High Tea 2014年5月27日
造勢之王
2014年05月27日
港股昨日高開低收，恒指報22963點，微跌2點；國企指數收報10126點，升5點，成交金額大幅縮減至392億元，創今年新低，雖然個市靜得咁緊要，但就唔代表無故講。
比亞迪上演股價大報復
中央近日有唔少政策出台，部份利好相關產業，好似新能源汽車，據講就係阿爺會大力推動的產業，消息令到行內先行者比亞迪(1211) 股價上星期舞高，但佢跟住就即刻出手抽水，由於配股價35元折讓去到15%，兼且外界對「股神」巴菲特無認購有啲失望(其實已經升咗咁多股神點會吼)，昨日配完股復牌一開市股價急插近10%，跌破40元，點知跟住多間大行發表唱好報告，股價跌幅大為收窄，回升至41.3元收市，倒升0.4%，上演咗一幕股價大報復，高低位差10%以上。
至於其他車股如長汽(2333) 升3.7%；廣汽(2238) 漲3%，報7.75元，分別為國指升幅最大首兩位股份。
講起比亞迪，不能不先講內地傳媒一些有關新能源汽車的報道，據引述話國家主席習近平最近考察了上汽集團，期間明言發展新能源汽車是中國從汽車大國邁向汽車強國必經之路，要求車企要加強研發，開發適應各種需求的產品，使這個市場成為新的增長點。
習近平唔係得把口講，佢話音剛落，多個城市補貼新能源汽車的消息隨之蜂擁而起(嘩老闆一講就做咁快手)，武漢、西安等多個城市上星期相繼推出補貼政策，差不多同一時間，上海市政府宣佈了《鼓勵購買和使用新能源汽車暫行辦法》正式推行。內地留意行業發展的人士分析，接連密集的補貼頻頻在各地出台，顯示推動新能源汽車唔再停留喺示範作用階段，而係會大範圍推出，形容政策「落地性強，支持力度空前」。
在有利的大氣候下，主打環保混能車概念的比亞迪又點睇呢？中央加大扶持力度，對佢可以話有辣有唔辣，辣的是領導人出到聲，相關國企必然會大力出擊，加埋其他民企，幾乎肯定會出現一窩蜂搶食，好似習近平巡視的上汽，據講佢哋的電池和內外裝飾材料的環保和輕量化做得好好。
幾年前世博時，上汽已講出大力發展電動車的大藍圖，睇嚟一路推進緊。
至於有利的是，比亞迪喺整體核心技術已經有少少優勢，尤其係佢掌控了電池、電機同電控三大核心技術。
內地傳媒仲吹緊佢5月在行業繼續領跑，主力開發的混能車「秦」供不應求，市場統計該公司在首季市佔率，新能源車佔五成，插電式混能車更加超過八成。
批完股有大行護航
相關報道出街，比亞迪就即刻郁手配股，有茶友笑言，呢樣真係唔知係好彩定係其他一種合唱團，不過無論點，佢批股之後大插，尾市又喺大行唱好下彈番上，仲高位收市。
喺發功的大行中，摩通話今次大折讓配股對比亞迪股價短期構成壓力，但可消除資產負債表短期制約，擴充電動汽車電池業務，維持「增持」評級，目標價由67元輕微下調至65元。瑞信撐得仲緊要，聲稱比亞迪的配股應視為正面消息，因為可平息投資者對其資金流動性的憂慮，透過放寬電池供應瓶頸，提升電動車業務。
該行維持其「跑贏大市」評級，目標價為74元。喺大行護航下，比亞迪單日波幅接近一成，假如夠膽喺低位撈貨，即日已經可以食胡，如果這種表現係公司造勢造出來，佢都可以叫做造勢之王咯。
陸羽仁
金融High Tea 舊文