陸羽仁 BLOG 2014年5月27日
位高勢危
2014/5/27 上午 09:37:40
網誌分類: 經濟
昨日係陣亡將士紀念日，美股休市一天。
標普500指數上週五創新高，突破1900點。至於嚟緊嘅夏天，後市會點？紐約有著名交易員認為後市會表現唔錯。美股今年初表現麻麻，主要係受三個因素壓住，首先係時好時壞的經濟數據及企業盈利，部份原因係受天氣惡劣所致，其次係聯儲局收水，熱錢大幅撤離新興市場，回流到歐美這些比較穩定的市場，引起投資者對新興市場會唔會爆煲的憂慮，最後係國際局勢因為烏克蘭分裂而升溫。
不過，睇現時情況，經濟麻麻地但尚算OK，新興市場唔錯，烏克蘭局勢有緩和跡象。特別係新興市場股市表現仲相當好，安碩新興市場指基金(iShares Emerging Market ETF) 上週五收市仍然企於接近52周高位，今年上升了3.2%，好過標普500指數的上升2.8%。
至於美國企業盈利表現，第二季度調整輕微，當中的確有幾家大零售商生意唔得，但亦未有預期會有嚴重虧損出現。Nick Raich在分析美企盈利走勢平台The Earnings Scout上預期，來季美企增長好有可能再度加速(re-accerate)。
如果睇股市恐懼指標VIX指數，投資者又似乎幾樂觀。VIX指數上周收報11.36，係2013年3月以來最低。反映投資者認為後市風險非常低。一些分析師認為，股市即將進入夏季的清淡行情，而且沒有什麼重大變數足以改變當前走向，VIX可能會進一步下跌。
不過亦有人有唔同意見，TD Ameritrade衍生品業務主管J.J. Kinahan則認為，VIX指數會這麼低的原因之一，係今年其實沒什麼進展，美股升勢唔係好明顯。標普500指數今年以來漲幅只有2.8%。VIX指數偏低，反映了市場出現放鬆警惕的態度，可能刺激投資者過度追逐風險。
National Securities首席市場策略師Donald Selkin亦認為，VIX指數愈低，市場超買情況愈嚴重，很容易出現某種回挫。尤其係中國經濟正在降溫，反彈遙遙無期，小型股羅素2000仍在走軟的情況，美股走勢其實唔可掉以輕心。通常在美國經濟改善時，小型股都是美股的領漲的先鋒。
瑞信中小型股分析師Lori Calvasina昨日對CNBC講，羅素2000指數估值已經高估了好多，估計仍然會繼續下跌。佢認為近期的經濟增長唔似好多經濟學家預期的咁好，所以對大市態度審慎。佢話當市場預期經濟轉好，中小型股票往往會跑贏大市，而經濟預期轉壞，就會落後大市。她認為經濟增長如果能夠穩定保持3%或以上，才會改變現時的悲觀睇法。
睇完呢啲分析，睇唔到乜方向，可以話股市上高位時，就有位高勢危怕佢回調的感覺。
陸羽仁
回應(6) 我想回應
陸羽仁 BLOG 舊文