異動空間：衞生麻雀式炒股 - 魏力
終於捱過4月，過去一周，魏力處身的蘋果投資版，靜過圖書館自修室，同事偶而閒談，講嘅係「晏晝叫乜外賣？」「Playoff超刺激！」「噚晚有冇睇歐聯？」報價機熄了，錢都draw走埋，即時新聞唔係「瀉」就係「插」，洗完倉可再散水，廿大升幅榜的股份，一係用幾萬蚊mark高，一係創新低後技術反彈，入市意欲跌到負數。
李小加公佈滬港通細則，AH大折讓股又落鑊，魏力隨手用紙寫低個價，買入一拖(038)及津創環保(1065)，埋單每隻又輸廿格，引證承接力極為薄弱，個市只剩少數炒鬼，購買力有限，升勢自然難以持續。短期都係玩「衞生麻雀」，買股票齋用把口追好了。
講返個市，結算日虛挾321點後，翌日原棍奉還，可見淡友絕對未鳴金收兵，更係為所欲為，邊挾指數邊開淡倉，戲肉相信將於本月上演。騰訊(700)啡底股失守，金山軟件(3888)高位唔見三成，銀娛(027)、金沙(1928)大成交爆落，無運行。新經濟股強撈冇幸福，宜及早離去。異動股可留意中信資源(1205)，劣市下大成交突破下降軌，處於各主要平均線之上，MACD雙牛動力十足。
魏力
http://www.facebook.com/2012jason
上一則: 何車500：中通信3.8元吸納 - 何車
下一則: 青心直說：訊息公平之戰 - 胡孟青
異動空間 - 魏力 舊文