中環在線：林寶堅尼車主中國最年輕 - 李華華
強國客愛林寶廿零歲買到當玩具
內地型男影星黃曉明之前送架林寶堅尼畀Angelababy，打造「林寶baby」。原來林寶堅尼係中國富二代嘅新玩具，車主平均年齡30歲左右，唔怪得今年36歲嘅黃曉明揀來做女朋友25歲生日禮物。廿幾歲揸林寶未算威，喺強國，最後生車主係teenager，係全世界最後生嘅林寶車主。
華華早排同林寶堅尼總裁兼首席執行官Stephan Winkelmann傾偈，佢就話歐洲車主平均超過40歲，美國約30至35歲，中國最年輕，有啲甚至係少年，「買車啲錢可能來自父母」，林寶堅尼睇中呢班年輕車主，「希望跟他們建立終身關係」。
■林寶堅尼去年推出車價530萬元的Huracán，僅4個月中國已有130多張訂單。 黃偉傑攝
「新細牛」Huracán暢銷
廠方舊年底推出俗稱「新細牛」新款跑車Huracán，中國售429萬元人仔，4個月就接到130張中國客戶訂單，全球總訂單1,500張中佔最多。
以「鬥牛」形象深入民心嘅林寶堅尼，去年喺中國就賣咗約200架超級跑車，輕輕差過前一年，Winkelmann就無今年銷售目標，情願質素行先，無壓力要破任何紀錄，最後實際銷量幾多，都要睇番工廠產量而定。
林寶堅尼舊年最暢銷嘅市場係美國同中國，雖然林寶成為強國富二代新玩具，但Winkelmann強調「永遠唔會大量生產」，仲特登維持供不應求情況，「這是奢侈品牌，包括我們的金科玉律」。他估計，就算阿爺打貪，中國超級跑車銷量仲可以維持6%按年增幅囉。
李華華
mailto:LiWaWa@AppleDaily.com
上一則: 寶鋼部署H股上市
下一則: 中環在線：向大陸設廠Say no - 李華華
中環在線 - 李華華 舊文