金融High Tea 2014年5月2日
失金周
2014年05月02日
「五． 一」黃金周假期，內地放假長過香港，過往係炒同內地自由行相關概念的時候，不過時移勢易，呢個概念慢慢褪色，今個黃金周無乜概念股熱炒，只有個別傳媒炒作自由行少了遊客來港「派金」。
內地公佈反映製造業走勢的4月採購經理指數有50.4，比上個月的50.3略升，顯示中國經濟已穩定下來。另外，美國聯儲局公佈議息結果，一如市場預期，繼續減100億美元買債規模，美股再上高位，中美外圍消息暫時向好。
內地周四開始踏入「五． 一」長假，港股周二期指結算日勁飆321點過後，周三即告打回原形，投資者有假前減磅味道。講番周二期指結算那天，尾市一個鐘抽升300點，當日晚上我同一個有炒期指的長輩食飯，佢問我個市一下夾上300點有乜原因，我話呢種急升市有真好和假好兩種，「真好」係有利好消息跟尾，多數是外圍如內地有利好消息公佈，而且外圍市升幅比香港更大，但當日收埋市查完一輪，外圍又無利好消息，內地股市升幅細過香港，呢啲似「假好」市，好有殺淡倉的味道。
夾完淡倉殺牛證
我話外資大戶如見市場睇淡人多，就算佢自己都係淡倉底，都可以夾一夾上，食一轉淡倉。佢夾100點你散戶淡友唔平倉，200點你平倉喇啩，仲唔平倉夾夠300點，炒短線九成投降，買入大量期指平倉，大戶咪沽番啲期指食胡囉。食完胡，第二日插番落去亦都好正常。
有信奉「升降機派」的中環茶友話，從牛熊證數據分析，21500點左右還有不少牛證密集回收區，有機會再插落去，食埋呢浸牛證。佢睇得準唔準，相信5月份開波就睇到嘞。
4月份港股玩大逆轉，首季強勢股喺4月份紛紛轉向，所以股民戰況唔可以只睇指數，仲要睇你揸咗乜股。
好似上個月仲好威猛的科網股，幾乎衰足成個4月，佢哋喺周三最後一個交易日仍繼續捱沽，騰訊(700) 失「啡底股」(500元)地位，收報483.2元，挫5.16%，跑輸一眾藍籌，拉低恒指91點。金山軟件(3888) 插8.45%，報23.85元；神州數字(8255) 瀉5.75%，報1.64元；雲遊(484) 跌4.73%，報31.25元，對呢啲股份的炒家嚟講，今個星期成為了失金周。
黃金周前無乜股熱炒之餘，反而和旅遊相關股份被人沽到開巷，呢類就係濠賭股嘞。濠賭股假前俾人質咗兩日，都有啲傷傷哋嘅感覺。佢同科網股係舊年最熱炒嘅股份，今年第一季開局亦都係威係勢，但跟住就走樣，家睇番就有啲似見頂回落跡象。
記得濠賭股喺高位開始調整，陸羽仁同澳門朋友講起續牌問題，當時佢話續牌可能會加辣，包括減年期。濠賭股跟住就跌咗落嚟，之後反反覆覆，有時彈吓，有時跌吓，始終無辦法重上高位，呢啲亦似似哋散貨跡象。
疊馬仔失蹤響警號
近期濠賭股的壞消息，係有個疊馬仔失蹤，聽澳門老友講，疊馬仔今年好多都遇到拖數，主要係好多內地民企老闆同豪客，今年都唔係咁好景，過去佢哋輸咗錢，就算即時還唔到，返到內地搞搞吓都搞番掂，呢個情況隨着內地反奢侈同反貪雷厲風行，就開始起咗變化，疊馬仔收數變得困難，最慘係債仔本着債大不倒的想法，有恃無恐，搞到債主保佢大，終於爆出咗有疊馬仔唔掂的消息。
呢樣嘢如果唔係個別問題，至少代表咗博彩業經營模式改變，賭廳唔得，要進一步倚賴無咁好做的中場「大笪地」生意。濠賭股跌咗落嚟，但市盈率跌到去20幾倍，已經正常番少少，但仍要有不俗盈利增長才可支持，要交功課唔易呀。
陸羽仁
金融High Tea 舊文