魚樂無窮：濠賭股洗倉有手尾跟 - 唐牛
■今次濠賭股洗倉潮，銀娛及金沙成交量增幅以倍計，睇嚟回氣時間又要延長。資料圖片
恒指縱有反彈，戰友卻繼續鴉雀無聲，今次反艇嘅輪到濠賭股。有報道指銀聯將致力於打擊海外洗黑錢、資本外逃及非法銀行卡使用行為，市場解讀為打貪行動升級，加上澳門將收緊內地客過境逗留期限，大戶小戶有理冇理先沽為敬。銀娛(027)及金沙(1928)成交量增幅以倍計，擺明洗倉格，回氣時間睇嚟又要延長。
咪睇少今次濠賭股洗倉潮，事關呢個板塊近年乃長勝將軍，唔少炒家都會用佢嚟做按倉對象，務求將個倉越滾越大；如今濠賭股潰不成軍，佢哋隨時要掟其他貨出街，骨牌效應大到你唔信。
唐牛講到世界末日咁，究竟市場上仲有冇好消息呢？
老老實實，所謂好消息壞消息，都係睇嚇市場點樣演譯。
市好時就算阿爺經濟數據差，都可被視為放水嘅徵兆，市差時美國就業數據靚爆，又會成為儲局加快退市嘅沽貨藉口。四洲集團(374)一如預期盈喜，埋單只升兩格，比著以往旺市，有一兩成都唔會收貨。冇計，現實就係咁殘酷。
威華達異動可吼實
客觀事實係，通常洗倉潮最後先輪到強勢股，科網、濠賭已先後中招，大市短線有望企穩，但始終元氣已傷，要重見年初歌舞昇平嘅光景，睇怕最快要等到第四季。
市淡亦有異動股，威華達(622)噚日陽燭突破圓底頸線，兼有成交配合，靚仔到不得了，話唔定有後著，短炒目標先睇0.23元。
唐牛
上一則: 炒友Blog：中線穩膽首選港交所 - 邱古奇
下一則: 股場放大鏡：復星好消息多快落鑊 - 歐陽風
魚樂無窮 - 唐牛 舊文