陸羽仁 BLOG 2014年5月9日
央行口術
2014/5/9 上午 10:03:44
網誌分類: 經濟
外圍股市定番，多得央行出手。
歐洲央行睇住歐元係咁升過唔停，開始有少少驚，怕匯價太高對經濟有影響。歐洲行長德拉吉又出口術，暗示可能在6月份推量化寛鬆，又話對減息抱開放態度，夾粗壓住歐元匯價，歐洲股市整體漲1.1%，提振市場氣氛。美國聯儲局主席耶倫近日盡顯鴿派本色，對樓市的評論也令人安心儲局不會太快加息。
第二個利好消息係美國零售似有生機。4月同店銷售升6%，比市場預期的3.9%好，亦遠比3月的2.8%高。部份零售商話復活節在4月是推高銷售因素之一，但3、4月合共今年銷售仍理想。兩個零售商L Brands 和Cato. L Brands話佢旗下女性內衣連鎖維多利亞的秘密4月銷售上升8%，遠好過預期。美國係消費經濟，消費數字好，股市都好啲。
第三個因素係美國最近一周的首次申領失業救濟人數減少2.6萬人至31.9萬，遠低過預期的33萬。幾個利好因素加埋，美股早段造好。但中午過後，公用事業股和能源股被拋售，大市掉頭回落，由升轉跌，杜指臨尾後抽，幸保不失，收市升32點至16551點，標普500指數跌3點，收報1876點；納指跌16點至4051點。
美股午後變臉的主要原因係俄烏緊張關係持續升溫影響。有報導稱，大約15000名烏克蘭士兵已在靠近俄羅斯邊境地區集結。而俄軍亦進行「大規模反攻」的軍演，俄羅斯總統普京亦到場視察演習。另外，俄羅斯表示，為了回應美國與加拿大實行的廣泛制裁作行動，由6月開始，俄羅斯將把烏克蘭列入先付款後使用天然氣的國家名單之中。
納指連續第三日向下，錄得4月初來最長跌勢，全年累積跌幅3%。當中包括Groupon等網路股在內的Global X社交網絡指數基金(Social Media Index ETF)自4月22日來累計下挫了超過14%。而有穩定派息同盈利紀錄的行業，例如公用事業股同能源股今年表現強勁，其中的公用事業股整體累積升幅達到12.5%，亦帶動標普500指數升緊1.5%。彼此表現差距之所以咁大，主要係投資者見到新經濟動能股已經升得好高，價錢認真唔平，所以將資金抽出，搬去買比較平而且有實力的股票。
但昨日公用事業股遭到顯著拋售，標普公用事業股指數下挫1.2%，能源類指數跌1.3%。拖累大市午後下滑。有分析警告，昨日見到公用事業股同能源股下跌，可能係大市整體出現危機的信號。保誠財務的市場策略師Quincy Krosby表示，大市仍然疲弱，市場正憂慮沽售潮正蔓延到有避險天堂之稱的防守性股票，這可能導致整體市場的崩潰。O"Neil Securities紐約證交所場內交易部董事Ken Polcari 亦指出，「股市面臨阻力，嘗試挑戰阻力位，但沒有動能突破。」
不過科技股就定番少少，之前跌得甘的Groupon、Twitter、LinkedIn、Netflix都企穩，大多微跌收市。新上市的手機保安應用公司Cheetah Mobile不止以14美近高端定價，首日交易仲升0.7%，或許對阿里巴巴上市有啲利好啩。
陸羽仁
回應(5) 我想回應
陸羽仁 BLOG 舊文