中環在線：
為錢也為興趣胡文新圓夢搞戲院
■胡文新認為，戲院業進入新階段，除音響、大銀幕外，就連爆谷都要好講究。黃耀興攝
提起合和實業(054)太子爺胡文新(Thomas)，除地產生意，大家通常諗起冰球，今年初佢就搞多瓣，進軍電影業，做埋戲院老闆，喺九龍灣國際展貿中心設戲院「星影匯」(Metroplex)，佢認為此舉有助合和加強作為業主嘅角色。
Thomas搞得戲院，本身都鍾意睇戲，不過佢公事纏身，經常要出差，佢承認好多時都係喺飛機上面睇戲，或者參加首映禮先入戲院。不過，為觀摩其他戲院嘅設備與質素，佢𠵱家都多咗約朋友入戲院，最近就睇咗《變種特攻：未來同盟戰》。
早於2005、06年，佢曾經邀請戲院商喺九展租場搞戲院，但當年電影業不景氣，惟有將位置轉搞保齡球場；直至兩年前，佢見電影市道越來越旺，搞戲院嘅念頭再現。佢認為，雖然𠵱家好多人選擇在家或上網睇戲，但戲院喺聲效、畫面質素、氣氛各方面仍有優勢，以《阿凡達》為例，入戲院睇嘅效果始終較佳。
料有助加強業主角色
覺得有得做之後，佢再跟業界打探，發現攞電影放映冇想像中難，加上九展地方大，有中庭、宴會廳等，可以配合舉行電影首映，「如果電影院只係租客，業主較難配合」，於是佢就拍板自己做埋，戲院今年2月試業，人氣電影《竊聽風雲3》上周二就喺星影匯舉行首映，戲院同日正式開幕。
Thomas承認「搞戲院都想賺錢，賺多賺少就視乎市場，不過主要係睇到自己有生財工具(意指九展物業)，而公司嘅發展路向都係加強業主角色」。簡言之，佢都係想搞旺九展整個收租項目。
■九展地方大，配合到星影匯搞首映禮活動。 計劃辦電影節拓非主流市場
雖然Thomas希望戲院有錢賺，但係佢並非只向錢看，都夠膽播放相對另類、票房未必有保證嘅電影或紀錄片，包括講學民思潮黃之鋒嘅《未夠秤》、有關鮮魚行學校兩名基層小學生嘅《子非魚》，將來亦計劃舉行電影節活動。
Thomas指，參考過好似台灣、日本、南韓等重視文化嘅城市，都會有另類電影市場，而且相對普遍，本港電影市場喺主流口味以外，應該亦有空間，社會都有需求。佢認為，香港曾被譽為「東方荷李活」，電影業將來仍有發展空間。
以《子非魚》為例，原先只上映4場，市場反應良好，後來可以加場，可見呢類影片即使票房唔及主流電影，但亦有捧場客。
也許本港嘅富二代，都想喺藝術、文化、體育等方面為香港作出貢獻，做生意之餘，亦重視企業責任，減低上一代予人充滿銅臭嘅感覺。
李華華
mailto:LiWaWa@AppleDaily.com
【壹錘定音】星期一至五，早上8點開咪！
http://hammerout.hk
立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp
LiWaWa@AppleDaily.com
中環在線 - 李華華 舊文