金融High Tea 2014年6月9日
利息大局
2014年06月09日
周末都有啲新消息，例如長實(001) 的環宇海灣加推單位快速去貨，中國公佈5月出口數字回升；加上美股再創新高，都有利大市。
中國最新公佈的進出口數據顯示，5月份中國出口和去年同期相比由負轉正，以人民幣計價，5月出口1.2萬億元人民幣，按年增長5.4%；貿易順差增至359億美元，按年大幅增長了70.3%。若以美元計算，出口按年則增長了7%。據彭博通訊社統計，市場估計的中位數增長是6.7%，實際出口數字超過市場預期，減低了市場對中國增長放慢的憂慮。但睇番5月進口，以人民幣計價下降了2.9%，若以美元計價亦跌1.6%，卻遠低於彭博統計市場預期中位數增加6%，進口無力顯示購買原材料、投資、消費的意欲都唔夠高，經濟增長存在風險。
出口好轉經濟續穩
美銀美林中國首席經濟學家陸挺話，由於中國由去年4月份開始打擊虛假貿易，因此去年5月份開始，出口基數基本上剔除了虛假貿易成份，令數字下降，所以今年5月出口反彈符合預期。5月份的出口先導指數，較4月份輕微提高，預示未來兩至三個月內，出口有望繼續好轉。
無論如何，外資好怕中國經濟硬着陸，唔敢買中國股票，如今出口數字好轉，有助穩定外資信心。有人話中國樓市唔得靠出口，中國指數研究院最新報告顯示，5月份中國100個城市，新建住宅平均價格約為每方米1.1萬元人民幣，按月下跌0.3%，是2012年6月以來，百城房價首次錄得按月下跌。
長實推盤貨如輪轉
內地樓市繼續唔掂，但香港樓市正如我兩星期前所講，有一個細細哋嘅小陽春。長實荃灣盤環宇海灣繼續大手去貨，第二批推出468伙單位，結果上周六開售沽出逾450伙，銷情理想，加埋對上一個周六開售沽出的591伙計，過去兩個周末該盤累沽1040多伙。長實乘勝追擊，公佈加推237伙價單，價碼只是微升。
長實執行董事趙國雄話，計劃在短期內推出集團旗下另一新盤大埔嵐山，料項目未來軟銷一至兩星期後，可隨時推出。我就話長實呢個薄利多銷策略，食正用家等唔切要上車的需求，而且快快手開盤，一個接一個咁推，盡吸市場購買力，我估嵐山同樣會以低價轟炸，貨如輪轉，有理無理，去貨為先。其他發展商手慢腳慢，又要惜價，隨時錯過咗今年炎夏呢個賣樓窗口。
摩根大通去年估今年香港樓價會跌20%至30%，上周四轉軚睇好地產股，話樓市二手成交復甦，以及大型新盤銷情理想，將支持樓價免於顯著下跌，佢調高多隻地產股目標價，將新世界發展(017) 的評級由「中性」上調至「增持」，目標價大幅提升由7元升至11元，大幅提高了57%。恒地(012) 的評級亦由「減持」上調至「增持」，目標價提高逾50%至60元。
美股創高利息話事
老實講，好似新世界咁，摩通當日睇7元，又真係低咗啲，但如今佢調高目標檟，話11元(現價8.98元)，我又估無咁快到。地產股近排都升得幾急吓，小心炒埋呢一兩個星期，又要有較大回吐。
上周五美股又創新高，杜指收16928點，升88點，向住17000點邁進。散戶朋友就媽媽聲，話美股大升，港股上落，炒港股無肉食。
我同佢講，散戶唔留意環球市場大勢，所以好難睇到港股的大環境。年初至今，美股杜指、標普500指數屢創新高，反映科技股的納指跟唔上，未能創新高。另外，新興市場年初至今升咗好多，但係香港同A股跟唔到。朋友問這意味啲乜呢？我叫佢先睇大局，在大局嘅大圖畫底下，才會睇到港股大勢，甚至科網股同濠賭股這些熱炒股的走向。
關鍵要睇美國利息，美息走勢左右着股市。美國10年期債息由聯儲局去年5月提出收水開始，由低位1.6厘，一路話收水，債息一路抽高至3厘，今年1月見3.06厘呢個小頂；然後一路回，5月尾一度插穿2.5厘，近日反彈，最新報2.5967厘。
去年下半年，債息向上的時候，股市唔好，但美股強啲，去年10月已見底偷步反彈，新興市場底子弱啲，要見住債息由今年年初開始回落，新興市場(中國除外)才開始大幅反彈。
呢幾日，杜指及標普500指數屢創新高，其實升幅唔係好多，年初至今，杜指只係升咗2%多少少；標普500指數未升夠6%，比起前沿(Frontier)新興市場，其實只係「毛毛雨」。睇各地區今年的股票指數基金(ETF)走勢，已知不同市場的狀況，埃及大升23%、土耳其漲20.2%、印尼升18.8%、印度升15%。點解呢啲新興市場今年升咁多？原因係去年市場利息上升的時候跌得好多，家利息下跌，亦反彈得多。
債息回吐新興炒高
在這個升市大環境下，唯一例外嘅，就係中國A股，升得好少，因為中國經濟放慢，兼且資金緊張，資金成本高企，股市難炒。中國股市唔得，亦拉住港股後腿，令港股受惠唔到今年上半年利息下跌的環球升浪。
那麼未來會點呢？大環境仍然睇利息。我對美國10年期債息走勢，嘗試做個估算，美國10年期債息去年在7個月內，由低位1.6厘升到3厘樓上，粗略計升了1.4厘；之後回落調整，升得急亦跌得急，假設回吐升幅的一半，就是相當有力的支持位。1.4厘跌幅一半係0.75厘，所以大約在2.35厘附近有好強支持。
美債息5月28日最低見過2.44厘，之後反彈，要睇債息再次回落時，會唔會穿2.44厘呢個近期低位，我估即使穿低位，亦好難跌穿2.35厘。今年上半年人民幣貶值，令資金回流美元資產，有利美債，令債價向上，債息回落。中國推低人民幣支持出口，如今人仔跌咗3%，出口已回升，人仔唔似會再大跌，減低了資金外流美債推低債息的機會。
利息向上炒股受壓
美國債息去年下半年大升，是因為聯儲局宣佈逐步停止量化寬鬆，大勢仍然係反覆向上，債息未來走向睇聯儲局幾時明確暴露加息計劃。聯儲局主席耶倫早前已講過會於明年初加息，但亦有唔少人唔信佢會加息。
我覺得唔信佢加息的人，唔係好明白中央銀行家的心態，佢哋就好似警察咁，必要時要開槍對付賊人，佢啲子彈就係加息或者減息。美國聯儲局聯邦基金利率現時減至0至0.25厘，意味着佢支槍已經無晒子彈，結果只能用極之超常規的量化寬鬆去救市。如環境許可，聯儲局很想儲番啲子彈，以備不時之需，加息等如入番子彈入支槍度，例如加番1至2厘，佢感覺會好啲，因為在必要時，可以減息救市。估計聯儲局明年好大機會加息至1厘，後年加到兩厘，所以加息是一兩年的大趨勢。
如果假設是對的話，市場利率大勢會反覆上行，美國10年期債息這次回吐後會再向上，估計會上破3厘的高位。利息趨升，將令大市受壓。點解杜指和標普500指數近期上咗新高，但納指與3月高位(4372點)仍有1.2%的差距？就因為科技股唔係咁睇基本因素，只係炒憧憬，息低水多時炒作好勁；息一升，資金收緊，對佢哋影響最大，納指無力，顯示市場對利息前景有戒心。
如果納指今次無力再創新高，意味着已經見頂，隨住利息上升，未來一年有一級級向下的風險。香港的科網股同賭股好似納指，亦是炒憧憬的股票，所以炒呢啲股唔同舊年咁好景，要小心定好止蝕位，先至好去玩呀。
陸羽仁
金融High Tea 舊文