異動空間：波司登五折之旅
魏力新婚歐遊首站去倫敦，食玩之外當然唔少得「濕平」，來到Oxford Circus血拼，行行嚇魏太大叫一聲：「波司登(3998)呀！」魏力向左一望，眼見一棟三層高、設計獨特的波司登海外唯一旗艦店，有興趣睇相的話，請到小弟facebook望下。閒日下午2時，店內做緊五折清貨大特價，10分鐘過後，除我們之外得一個客，都係亞洲人，估計波司登在西方的知名度不高。三名職員見我們入店亦看作透明。咪以為波司登只係賣羽絨，其實店內一半以上產品均為男仕服裝，恤衫、西裝外套、毛衣、皮鞋、領呔，以至優閒短袖T恤一應俱全，感覺有點像G2000。
隨手拎起件藍白色直紋西裝外套，五折後賣147.5英鎊，折合1,950蚊港紙，款式也是一股強國味，坦白講真係試都費事，同款Uniqlo相信唔使1,000蚊。往上層走，一件無折輕薄羽絨賣250英鎊(約3,300港元)，款式輸足Uniqlo幾條街，可見滯銷十分合理。高盛早排指，淘寶網羽絨的售價比波司登平50%以上，網購衝擊不容忽視。截至3月底全年少賺36%，毛利率、收入雙降，過去一年股價已打五折，看來經營困境尚未過去。
魏力
http://www.facebook.com/2012jason
魏力
異動空間 - 魏力 舊文