陸羽仁 BLOG 2014年7月17日
懶理警告
2014/7/17 上午 09:53:18
網誌分類: 經濟
美股又創新高。時代華納拒絕21世紀霍士的收購協議，時代華納股價急抽，刺激市場投資氣氛，加上蘋果同IBM合作搞銷售，英特爾業績靚仔，科技股造好，推動美股再創新高。杜指連續三日刷新歷史新高紀錄，尾市升幅略為收窄，收市仍不負眾望，創出收市歷史新高，收報17138點，升77點；標普500指數漲8點至1982點，納指跑輸大市，微升10點至4426點。
昨日市場焦點係時代華納拒絕21世紀霍士上個月提出的收購建議。建議收購價每股85美元，涉資800億美元，收購價高過當時時代華納股價25%。收購價當中六成用股份支付，四成俾現金。出手收購的21世紀霍士老闆梅譯話，併購後的公司總營業收入料達650億美元，炒掉一批重覆的人手，每年可以節省115億美元開支。
《紐約時報》昨日報道時代華納董事局已經拒絕梅譯的收購建議。呢個都好易理解，合併之後，呢班董事隨時會被梅譯叮走。消息傳出，時代華納股價急抽17%至83.13美元，係表現最好的標普500指數成份股，而21世紀霍士股價就急6.2%，報33美元。
美企業績普遍好過預期，亦係推動大市向上的主力。其中以英特爾業績靚仔最引人注目，佢第二季營收年增8%至138億美元，好過預期，純利28億美元，亦遠好過去年同期的20億。英特爾預測第三季營收為144億美元，好過第二季。股價抽高9.3%至34.65美元。併購及合作消息蠢動，美企財報與交易消息推動蘋果、時代華納及英特爾等攀升。
美國聯儲局主席耶倫周二發表的半年度貨幣政策報告中，罕有地提到小型企業、生物科技及社交媒體股「估值過高」，這種評論是14年來首次，亦是昨日納指跑輸大市的原因。
點睇都好，耶倫咁講都係一種示警。儲局對上一次評論個別股價過高，已經是2000年7月，當時聯儲局由格林斯潘揸飛，在貨幣政策報告指出，科技股估值高越來越令人不安，企業違約比率增加，反映股市的風險，結果科網股亦在同一年爆破。格林斯潘示警有前科，佢曾在1996年一次講話中，指當場的金融市場出現「非理性亢奮」，成為一時經典。
今次耶倫用語溫和好多，但都係一種警示。Global X社交媒體交易所交易基金(ETF)主要持股包括Facebook及LinkedIn等股票，呢隻ETF的去年升64%；反映生物科技股表現的納斯達克生物科技股指數去年亦升逾65%，而家預測市盈率去到554倍，可以用一個「顛」字去形容，當然科網股都唔輸蝕，Twitter預測市盈率880倍、 Pandora160倍、 Groupon58倍、 Facebook47倍，熱度十足。
耶倫警告，股市照升，好有牛市的特色，短期都係向上，短炒順勢易贏，但係揸住呢啲高市盈率股，就唔好睇得太長線啦。
陸羽仁
回應(2) 我想回應
陸羽仁 BLOG 舊文