陸羽仁 BLOG 2014年8月18日
超低債息
2014/8/18 9:21:41
網誌分類: 經濟
美股繼續受地緣政治風險舞動。上週五，烏克蘭宣稱已摧毀俄羅斯一支跨境武裝車隊，歐盟隨即表示，對烏克蘭東部地區局勢越來越感到擔憂。歐洲股市受消息拖累收低，德國一直都被認為是歐元區各國中最容易受到俄烏衝突影響的國家之一，德國股市勁跌1.4%，法國股市跌0.7%；股市恐懼指標VIX指數急跳20%以上至接近15水平，美股終結了連日的反彈勢頭，杜指朝早最多大跌130點。
稍後俄羅斯否認車隊被襲事件，並且指斥烏克蘭政府為「癡人說夢」美股大幅受窄跌幅，杜指收市跌51點，收報1663點，標普500指數收復所有失地，收市報1955點，平手離場；納指更反敗為勝，收升12點至4465點。總結全個星期，美股仍有唔錯進賬，杜指升0.7%，標普500指數漲1.2%，納指最勁，勁升2.2%。
美股緊貼住烏克蘭局勢變化舞上舞落，跌得快亦回復得快，投資者只係嚇出一額冷汗，有驚無險。美股雖然身處風高浪急的國際政治風波之下，相對歐洲股市，便表得非常硬淨，有好強的韌性。
美國市場利率低企係股市有支持的原因之一。指標性的10年期國債利息上周五低見2.3厘，是14個月低位，周五收報2.34厘，仲有人估會見2.2厘。導致美國低息的原因眾多，歐洲預期量寛，利息嚴重低水，烏克蘭、伊拉克、以色列動蕩，特別是俄國資金怕制裁令盧布貶值，大量湧出到各地避險，而美債係主要受惠者，據Lipper的數字，過去4周供有45億美元流入美債市場，資金流入量是6個月以來的高位。市場利息低企，令百業興旺，利息咁低股市好難跌。
另一個低息底因係市場唔信聯儲局可以好快、好大手地加息。U.S.Bank私人客戶儲備公司首席投資官德克魯(John De Clue) 解釋，原因係美企第二財季的財報普遍好過預期，美國經濟仍在增長。但又唔係增長得好勁，經濟數據好壞參半，例如上週四公佈的首次申領失業救濟人數，繼對上兩周跌破30萬人大關後，最近一周又升番上31萬人，高過市場預期；而上週五公佈的7月工業生產增長0.4%，高於市場預估的增長0.3%；製造業產出增長1%，也遠高於預期增長0.4%。與此同時，紐約聯邦儲備銀行公佈8月製造業指數從7月的25.60降至14.69，湯森路透/密西根大學美國8月消費者信心指數初值降至去年11月75.1以來最低。
而美國經濟未有好明顯增長，好大程度上舒緩了投資者對聯儲局提早加息的憂慮。上週五，聖路易士聯儲行長布拉德(James Bullard) 話，通脹保值國債(TIPS)的實際利率「低得令人震驚」，反映投資者態度，較之於聯邦公開市場委員會(FOMC) 更顯「鴿派」。他認為美國國債收益率已被嚴重低估，並且預期美國將於2015年1季度末首次加息。呢個時間與市場早前所預期的，亦唔係相差太遠，所以市場未有太大反應。
至於另一位聯儲局官員，明尼亞波利斯聯儲行長柯薛拉柯塔(Narayana Kocherlakota) 的取態就更加「鴿派」啦。佢話美國勞動市場仍見疲弱，通脹率與聯儲局目標仍有很長的距離，他表示同意國會預算辦公室早前指出，美國要用超過10年時間才能令通脹率在經濟衰退後，回復正常，並且認為通脹率要到2018年，才會升抵2%的預測。鑒於美國通脹較低，聯儲局還有推行支持性政策的空間，他認為過早加息會係一個錯誤。聯儲局官員的講法雖然不太一致，但「鴿」味盎然。美股能夠企得硬淨，又唔係出奇喎。
陸羽仁
回應(3) 我想回應
陸羽仁 BLOG 舊文