陸羽仁 BLOG 2014年11月12日
阿里泡泡
2014/11/12 09:02:59
網誌分類: 經濟
美股牛皮靠穩，無甚可觀。杜指及標普500指數都係微升1點，分別收報17615點及2040點；納指升9點，收市報4661點。昨日市場焦點，自然係阿里巴巴喺「光棍節」的銷售數字啦。
「光棍節」起源於大陸網路文化和校園文化，是中國單身男女創作出來的節日，他們希望借呢一日大搞交友聚會活動，以脫離單身的日子，所以又叫「脫光節」(脫離單身的節日的意思)。2009年馬雲忽發奇想，在光棍節當日大造網上打折促銷，效果奇佳，網上生意火爆，2012年光棍節，阿里巴巴淘寶網上銷售191億人仔，2013年大增至350億元，今年仲勁，頭13個小時，銷售已經超過去年，全日銷售額比去年大增59%至571億元！
阿里巴巴昨日銷售大超往年，股價又係點呢？有分析笑言，股市向來都有個講法係「好消息當壞壞消息炒，趁好消息出貨」，而阿里巴巴昨日的股價就係一個經典例子。阿里巴巴股價昨日一度大跌4.5%至113.69美元，收市跌幅收窄，仍跌超過3.8%至114.54美元，係美國上市以來最大的單日跌幅。
固然啦，投資喺較早前已經預期今年嘅「光棍節」，阿里巴巴業績會好好，所以股價已經提前炒上至上日已經炒到119美元以上，較上市價68美元暴漲了75%、市盈率接近60倍！有投資者趁好消息出貨，都好正常也。也有分析指，阿里巴巴股價不升反跌，與馬雲昨日接受CNBC訪時發表的言論有關，佢話「阿里巴巴的高股價是基於很高的市場預期，這讓他感到壓力。」又話佢甚至唔睇阿里的股價，「因為那反映了別人怎麼想我們。我們應該專注於我們的事業。」
阿里巴巴60倍市盈率，都有啲泡啦。阿里巴巴現時市值高達2,962億美元，超過實體經濟零售老大哥沃爾瑪的2,560億美元市值，阿里執行副主席蔡崇信話，全球互聯網充斥泡沫，「現今互聯網公司有利潤支撐業績，泡沫猶存，但尚未出現非常巨大的泡沫」。美股在高位，科網股賣未來，無泡先至奇怪。
另外，馬雲昨日表示，會將「支付寶」上市，市場會選在中國A股，馬雲話揀喺中國上市原因唔係賺錢，而係要讓公司的治理更加透明化。由於各種原因阿里沒能在A股上市。不過，我覺得「支付寶」涉及到金融呢個敏感範疇，阿爺會唔會俾佢喺海外市場上市，至係關鍵問題。馬雲做到咁大，要睇阿爺枱戲也。
美股連續5日創歷史新高，但近兩日已經有點悶悶哋，疲態畢露。對於美國經濟有人樂觀的同時，也有人感到好悲觀。《CNNMoney》昨日就撰文指出，美國經濟正展現雙重人格的因素。首先係勞動市場，美國上周交出理想成績表，10月失業率跌到5.8%，離經濟學家認為經濟強勁時的5%失業率已經相當接近。但在美麗的背面，美國仍有290萬人失業超過半年以上，遠較衰退前的數據高出1倍。更糟糕的是，美國有超過700萬人正在做兼職，搵唔到全職工作。唔少美國人都話，依家有工作就要偷笑了。
其次，美國人喜愛消費，消費佔了美國GDP的7成，而現實係美國人的薪資在這個經濟復甦期間，未有實質增長，薪資水準停滯不前，與衰退前相若，沒錢消費。第三點係美股大升，但美國人民卻感覺唔到，自從2009年3月美股觸底後，開始一連串的長期升勢。標普500指數就大升近兩倍！但資料顯示，美國只有一半人有錢投資股市，因此漲勢帶來的好處，有一半人無任何得益。結果係有錢的人更加有錢，貧富差距不斷擴大。
陸羽仁
回應(2) 我想回應
陸羽仁 BLOG 舊文