金融High Tea 2014年11月12日
執輸慘過敗家
2014年11月12日
滬港通效應繼續發酵，港股高開過百點，可惜跟住內地股市軟咗落嚟，令港股升幅收窄。中美股市在月頭已經開車，大家都上咗高位，港股家先追上嚟，咁啱撞着人哋調整，升勢又窒住咗，呢啲咪叫執輸行頭，慘過敗家囉。
細粒新股好好味
人民銀行再收水，向市場正回購兩百億元人民幣，搞到內地股市變咗過山車，上證指數早段三度升穿2500點，中午收市站穩2500點，惟投資者午後趁收水消息在高位食胡，拖累指數掉頭向下，跌幅更一度擴大至急挫逾1%，低位見2446點，創業板仲一度跌咗4%。滬市全日成交超過3300億元人民幣，創下A股歷史新高，喺滬港通正式啟動前後，相信市況會爭持較激烈。
由於A股升轉跌，令港股升勢放緩，最終僅升逾60點，50天線(23829點)再次得而復失，恒生指數收報23808點，升63點；國企指數收報10652點，升36點，成交連續兩日多於九百億元。喺內地炒新股熱潮未散下，香港「打新」仍然搵到食，中國鋼絲製品生產整體解決方案提供商盛力達科技(1289) 首日掛牌，收報11.34元，較招股價7.72元，高47%。該股每手500股，不計手續費賺1810元。佢集資淨額只有2.1億元，招股接獲1503份申請，共認購8235萬股，相當於超額認購25倍，超額倍數唔多，而且獲利率高，大額申請相當和味，真正係細細粒、好好食。市場下個焦點係中國最大核電公司中廣核，將於明日尋求通過聯交所聆訊，集資30億美元(約234億港元)。
呢排大家另一個焦點，係北京舉行的亞太經合組織峰會。內地以高鐵加基建外交，爭取鄰近國家合作，被譽為「中國版馬歇爾計劃」，成為市場炒作主題之一。國家主席習近平昨日見記者時再派定心丸，強調中國經濟將在未來相當一段時期內，保持中高速增長，而且經濟質量會不斷提升。喺呢個概念下，港口股就反覆有啲炒味，大連港(2880) 周初急升後昨日企穩，另一隻天津港(3382) 近排都反覆靠穩。
習近平表示有信心在改革發展穩定之間，以及在穩增長、調結構、惠民生、促改革之間找到平衡點，使中國經濟行穩致遠。他又強調，中國肯定會跨越「中等收入陷阱」，只是時間問題。佢同時提到，要推動區內互聯網經濟，加快完善基建，打通互聯互通的心靈之路，使道理越講越明白，事情愈來愈好辦。
小心電商股節後例淡
領導人都講吓互聯網發展，中環茶友講笑話唔知係咪啱啱網購完，喺光棍節攞啲應節話題出嚟講吓。趁住光棍節呢啲日子，網企紛紛報告成績，阿里巴巴光棍節首1小時，交易金額已達20億美元，旗下阿里健康(241) 股價造好。阿里巴巴旗下電商天貓仲宣佈，截至下午一時半，成交額已超過362億元人民幣，超過去年「雙十一」全日金額。不過，內地電商股份普遍未能受惠於好消息，仲有騰訊(700) 今日公佈業績，股民都要留意呢類股份或出現「一節淡三墟」。喺呢個電子商貿紛紛搶鏡的時間，央視就訪問咗阿里巴巴馬雲，他指支付寶一定會上市，但上市主要目的不是為錢，而是讓更多參與者能夠分享。馬雲仲話遺憾阿里巴巴沒有辦法在A股上市，希望支付寶有這個機會，不過，沒有就支付寶可能何時上市給出時間表。佢呢番話唔知係咪門面話，但至少內地消費者同官員會啱聽，仲有小小同A股贈興嘅作用。
陸羽仁
金融High Tea 舊文