一周三件：重慶機電落鑊
■重慶機電多項主打業務均受惠國策，前景看俏。 互聯網
上海電氣（2727）噚日復牌，終於確認阿媽希望透過注資上市公司，進行整體上市計劃。場內會獲注入優質資產，實現整體上市嘅，仲有重慶機電（2722），家陣H股市值，得十三億元咁大把。
食住幾瓣國策
喺上年四月，重慶機電管理層話，為咗配合混合所有制，阿媽嘅優質資產，會注入上市公司。重慶機電阿媽重慶機電集團，資產值上五百億元人仔，重慶機電現價（1.17元）喺五年低位浮浮沉沉，家陣H股市值十三億元，噚日復牌嘅上電，家陣H股市值，高達一百三十億元，係重慶機電嘅十倍！要估注資，重慶機電都唔會喺呢啲殘價做嘢。又國企注資，仍然係阿爺金融改革一個重要嘅topic，重慶機電俾阿媽湊大，係遲早嘅事。
咪扯咁遠，睇番重慶機電基地重慶市，為咗配合一帶一路國策，該市計劃到二○二○年時，包括汽車、高端裝備等等產業總產值，上到2.2萬億元人仔。重慶機電主打各瓣數，全部食到應。
又重慶機電獲眷顧之前，已經先起步，搵靚仔項目做，包括喺上年九月，新拓海上風電瓣數，對下供應設備畀中船重工。而上年十二月，國家能源局公佈，四十四個總容量一千零五十三萬千瓦嘅海上風電項目，列入開發建設方案，喺整治空氣汙染國策下，呢瓣項目亦快馬加鞭。又祖國唯一國家海上風電工程技術研發中心，亦係設喺中船重工，重慶機電下家，大有來頭，一個客已經夠砌，兼食正風電基建熱。
煲重慶機電，博集團食住幾瓣重要國策，中線有靚仔業績，再博集團注資，快高長大，當翻半番到1.8元計數，PB先得一倍，都仲未追到上電1.4倍水位，到時，重慶機電H股市值，亦只係二十億元咁大把。
錢雋
細價股專家
本欄逢周二、三、五刊出
錢雋
一周三件 - 錢雋 舊文