中環在線：賭王三太轉玩工廈
一擲億元 以往主力買住宅
■三太陳婉珍上月買入葵湧永得利廣場其中一層來收租。 資料圖片
賭王三太陳婉珍，跟唔少闊太一樣都鍾意投資磚頭保值，不過佢就冇四太梁安琪咁活躍，偶爾先至聽到佢掃番十個八個新盤住宅單位，近年佢亦好少出手，點知今年一出手，佢就以接近一億元，買入葵湧永得利廣場其中一層收租，由住宅轉玩工廈。
根據資料，三太喺上月十七日、即農曆年廿九，以超過九千八百萬元，買入永得利廣場二座二十六樓全層。呢一層單位面積超過二萬二千平方呎，計番呎價約四千四百蚊，算係市價。
呢個單位收租超過三十六萬一個月，回報4.5厘，相對𠵱家出租住宅嘅平均回報得兩厘，吸引好多；而且仲有加租空間，難怪三太唔買住宅，轉玩工廈。
聞說三太投資物業注重長線投資，好少沽貨，亦都唔係隨便入市，佢對上一次比較高調入市，已經係接近六年前嘅事，佢當年以超過一億元，掃入新地（016）旗下北角形品十七個住宅單位，揸咗咁耐都只係賣咗兩夥。佢十幾年前買落嘅九龍站凱旋門同君臨天下多個單位，仍然持貨。
■葵湧永得利廣場外貌。 資料圖片 四太買賣物業活躍
三太自己發展嘅跑馬地雲地利道服務式住宅Tagus Residences舊年落成，月租二萬二蚊起，據聞亦租得唔錯。
相比三太，四太梁安琪就明顯活躍好多，幾乎年年都會出貨入貨。淨係計舊年，都用成三十七億掃貨，物業包括寫字樓同工廈，四太亦鍾意成幢咁買，投資策略同三太好唔同。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文