中環迷你裙：港股連交戲都懶
■港股成交不見活躍，港匯再跌，Samantha的策略是且戰且走。 資料圖片
「咪俾我睇死」，通常講得呢句，多多少少其實希望對方別被自己睇死，最後換來的是失望，恒指，彈嚇好冇？美股跌三百點，你唔肯跌；A股昨日挾上3300，你好歹都給點戲，升八十點都唔夠！雖然港股升跌比例稍為改善，眼見成交不見活躍，美滙創一二年高港滙再跌，唔信邪，望埋MSCI香港指數，幅圖真係唔多開胃，Samantha策略是：且戰且走。
點解唔選擇休戰，因為阿爺最鍾意揀今日做嘢，過去創板來個即日鮮也不錯，但切忌、切忌炒股戀上癮。有時睇資料太多，隻股越睇越靚仔，從此愛上，不能自拔，就好似同隻股山盟海誓一樣，連個止蝕價拋諸腦後，最終短炒變長揸，唔係唔畀長線投資，只是閣下會錯失更多賺錢機會。今次誠意推介隻短炒股：中國安芯（1149）。中國安芯主要從事中國城市公共安全及工業生產安全領域，集中研發物聯網安防裝備。去年收購兆誼科技向民用安全領域轉型，上月發盈警料全年盈轉虧，因為大陸系統受到不同程度延期，ISD業務大跌和收購ESS後未錄大額收入。講到自己咁衰，其實兆誼科技擁有面部辨識系統高科技，大陸保安系統應有需求，加埋RSI和MACD雙雙出現底背馳，昨日主動買盤貼近八成，炒上7%，博個兩成反彈也不錯！
Samantha
本欄逢周三、五刊出
https://www.facebook.com/stocksamantha
Samantha
中環迷你裙 - Samantha 舊文