金手指 - 孫柏文 2015年5月12日
金手指：你覺牛市完未？
■四出搜羅國際大鱷的睇法，他們均對大陸股市泡沫好有興趣。 資料圖片
真係估唔到，上周孫柏文以極溫馨嘅提示方法，向中國趨勢（8171）嘅董事局及主席講啲建議後都冇幾日，佢哋兩位董事，即有線娛樂前阿頭徐小明導演，同埋前亞視執行董事盛品儒就辭職，真係估唔到事態發展會咁快。
我睇到公司通告後，冇八卦問點解，但以兩周前佢兩位講公司策略有得點做，相信該公司可能真係放棄做佢哋想做嘅業務，咁即係有可能諗買殼。不過睇股權，唔覺係好集中，即係就算有新買家呢刻向大股東買股權，如果話要轉業務、注資等，都可能有好多小股東反對。難搞。
A股泡沫大鱷有興趣
至於大市同天氣一樣好悶。4月嗰種升勢好似冇咗，而之前入咗市甚至坐艇嘅朋友都感唔舒服。唔好話睇本欄，淨係日日追住隔籬曾淵滄博士，都有如心靈雞湯，因博士佢對呢場超級大牛市仲係非常有信心。去到會勉勵啲艇客，若止蝕落車最終只會令自己後悔，因為如果止蝕後先唔會喺更低位再入，更唔會升凸後再追。
我同博士嘅睇法雖然一樣，不過大家都要問自己兩條好簡單嘅問題。第一條就係呢個牛市係咪堅先？第二條就係呢個牛市係咪已完？如果你信個市係堅，又信未完，咁而家呢啲市況就係入市嘅最好時機啦！
咁另一樣曾博士成日話嘅嘢，就係呢場香港大牛市唔係大陸同胞推動，而係啲國際大鱷。為考究是否屬實，我呢個禮拜四出搜羅啲大鱷嘅睇法。
佢哋講到世界資產，清一色都係覺得美股貴到泡沫遲早爆，對全球啲國債就用支槍指住佢哋啲頭都唔買，不過，講到大陸，就對大陸呢個泡沫極有興趣。咁雖然越來越易炒大陸啲股票，但香港啲股票吸引力好強。因為港股同歷史比未必平，不過對其他市場嘅股票，我哋確實喺現價「理性」好多。
趁悶入貨，好過最後人踩人咁入，大家識做啦？
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文