魚樂無窮：威高國際坐定等破頂
■上周五威高國際發盈喜。 資料圖片
恩達（1480）埋單再插五成，十蚊大關不保，值得留意嘅係，成交急增至24球，相當於街貨四成，買賣盤亦明顯變得活躍，有心人要沽貨，可謂易如反掌。究竟跌到幾時先完？睇番數據，今年初至上周二（即大炒前）平均交易價約5.2元，
亦係幕後人士嘅成本價，相信呢個水平會有支持，換句話說，現價計仲有四成下跌空間。
其實好股多的是，何必以賭博心態入市，要追求刺激，建議你過大海，鋪鋪清快靚正。講開好股，上周五發盈喜嘅威高國際（1173），肯定係其中之一，只要突破0.4元N頂阻力，海闊天空格。「唐牛，唔好蝦我記性差，同一番話你舊年底先講過喎！」無錯，當時威高發中期盈喜，最終埋單多賺1.3倍至3,611萬銀。最新全年盈喜呢？預計增長1.1至1.3倍，即約賺9,610萬至1.1億銀。「下半年盈利咪比上半年多成倍？」快而準！但睇睇股價，竟然原地踏步，你話係之前估值高定而家估值平？又睇下數據︰預測市盈率將降至8倍，比起龍頭莎莎（178）同卓悅（653）平均11倍，折讓三成，唔好忘記，威高係當頭起，莎莎同卓悅乃強弩之末，前者估值只會越來越平。睇真啲，威高有超過十年嘅派息紀錄，真金白銀呃唔到人，現價息率超過四厘，坐定定等破頂，又多一重安心！
唐牛
https://www.facebook.com/tongcow88
唐牛
魚樂無窮 - 唐牛 舊文