笑到最後：
三隻牛市必備股
今時今日港股，升跌唔夠500點，都只能夠話係波幅。上個星期四港股上午跌穿咗28000，之後好快反彈，然後收市又跌267點報28133，同本欄所形容嘅牛市一樣：「勒牛」，稍為升啲，就會勒住，唔畀去得咁快。
至於點解？好大程度係因為港股係「打工仔市」，即係基金所
講嘅「機構投資者比重大」。A股係「散戶市」，散戶變咗貶義詞，中性係「創業家市」，散戶拎自己錢出嚟炒，作風一定係參差、不依章法、做咗先講。
基金業九成以上係打工仔，打工仔最怕冇咗份工，保住份工靠唔出錯。4月初咁樣暴升法，對打工仔嚟講，太亂、追唔切、易錯，被炒魷魚風險大增。
可能外資已經放棄咗死沽，費事俾中資挾死，但佢哋一定係希望有秩序升上去，升一段勒一段，等一眾「打工大戶」有時間反應，所以港股升幅，一定係勒得緊過A股。
牛市已經出現，港股再升係必然，外資極其量只可以拖延。關鍵就係拖延嘅過程，就好似上星期四咁，可以震走大家。復活假期後，本欄講過，錯失最大升幅時間，只能用下策去跟返個市，下策就係買盈富基金（2800）。
呢個方法睇落最笨，實質最有智慧，因為一定唔會俾人震走，只要大牛市未完，就可以一齊笑到最後。
內地散戶熟悉騰訊
因為本欄錯過大升市，先至推介盈富，但漫長牛市，唔可以只靠一隻。有三隻股，高明認為，點都要揸：
1.港交所（388），市好一定資金多，港交所一定受惠。
2.平保（2318）係分析員噩夢，彭博綜合大市預測，首季每股盈利預測1.35人仔，實質係2.19人仔，分析員跌曬眼鏡，但反映外資仍然偏淡。另外，呢隻股一般升跌過快恒指半粒鐘，用嚟監察大市一流。
3.騰訊（700）。李純恩前輩一篇文章話，中國人唔鍾意睇旅遊節目，因為佢哋對探索新事物無興趣，「只對自己去過的地方有興趣」，呢啲係國情。同一道理，有港股通，中國人都唔會買滙控（005），只會買好熟嗰啲，例如騰訊。
牛市漫長，唔使嚇嚇死去，上星期推介過佳華（602）即日最多升27%；京維（1195）上星期最多都見過0.84元（推介價0.485元）。兩隻最近都回咗啲，咁就等嚇先啦！
高明
https://www.facebook.com/bigricetea
本欄逢周一刊出
高明
笑到最後 - 高明 舊文