異動空間：匹克真的復蘇了
人仔連貶三日，阿爺終於開腔安撫市場，中港股借勢反彈，騰訊（700）就成為挾倉對象，一隻貢獻154點升幅，即是撇除QQ，整體市況還是向下。但魏力手上的騰訊long put就凍過水，由賺一倍變倒輸一半，又係唔食糊變出銃的例子，雖則做期權都係三幾千蚊，純博刀仔鋸大
樹，輸盡有限數，但也是極之無奈。作為一個缸邊友，股災後一個月，家陣望住隻股票升緊，都完全冇意欲追入；明知隻股炒緊國企改革，是但買一萬股坐都冇興趣，皆因阿爺套拳招式變化多端，來無影去無蹤，完全意想不到，貿然出手必然露出破綻，俾阿爺一腳踢到九丈遠。還拖仲大鑊，左鈎拳後右鈎拳，周身重傷被抬出場。想到這裏，還是專心工作好了。
抒發完之後今日同大家睇份業績。頹咗幾年的體育用品股，上半年業績普遍復蘇，匹克體育（1968）半年多賺45%至1.76億人仔，經營現金流急增1.2倍至2.92億元；現金升至22億，扣曬負債處於淨現金水平，仲有6厘息，預測PE為高單位數，基本因素不俗，惟存貨略為增加。中午業績後股價急升，短線或有炒作機會。
魏力
http://www.facebook.com/2012jason
魏力
異動空間 - 魏力 舊文