一周三件：招商基金值博
■洪小源任主席的招商局中國基金，股價回到一年底水平，可以留意。 資料圖片
招商局中國基金（133）7月跟個市大插水，一個唔該，又跌落番一年橫行底的水平，資產折讓勁之吸引，又要睇睇。
按招商基金今年6月尾投資組合做準，金融業佔資產67%、文化傳媒近13%、醫農教
育4%，得1%係製造業，投資權重喺熱辣辣當打瓣數。又喺所有投資裏面，招商基金所揸上市股份，主要係得招商銀行（滬600036）同興業銀行（滬601166），其餘瓣數，絕大部份係非上市。家陣個市橫風橫雨，加埋兩隻內銀預測PE勁低，再跌有個譜，所以，對招商基金嘅影響，應唔會話太大。
折讓大有吸引力
招商基金去到今年6月尾NAV35.35元，現價（13.48元）係大幅折讓咗61%。就算退幾步，計埋人仔貶值同上市證券投資縮水，將NAV打九折計數，招商基金仍然得0.42倍PB。
場內大熱惠理（806），往績4倍PB，專業預估明年2.9倍PB、滙豐中國翔龍基金（820）到上月尾NAV做準，現價0.8倍PB。場內各大熱賣中資股ETF，最高折讓一隻，只係講緊15%，或0.85倍PB。講折讓，招商基金係勁具吸引力。
喺非上市投資當中有包括透過「華人文化產業投資基金」投資星空中國、上海東方夢工廠等製作公司，而熱爆祖國嘅「中國好聲音」就係出自星空中國。招商基金文化瓣數投資係寶，其中一個單位一資本化釋放價值，招商基金都水漲船高！
就保守點以招商基金打九折NAV31.8元做準，當去番咁多年嚟平均0.51倍PB，講緊要升20%到16蚊水平，兼未有耐上到其他China play基金嘅PB水位。
錢雋
細價股專家
本欄逢周一、三、五刊出
錢雋
一周三件 - 錢雋 舊文