金融High Tea 2015年8月14日
驚魂甫定 不宜搏命
2015年08月14日
人民幣匯率連續調低，震驚全球投資市場，隨着人行在周三尾市拋美元穩人幣同解畫，市場情緒稍為穩定，加上美股憧憬聯儲局因人民幣貶值押後加息高收，人民銀行開記者會否認人仔有計劃貶值10%，個別受匯價震盪的板塊好似航空股逐步回穩，反映第
一波震盪漸漸過去。不過，港股經7月份A股暴挫後，再受呢次匯價震盪嚇完再嚇，相信氣氛無咁快可以恢復。
人行定心丸 留神嗒真
人仔連貶，市場反應惴惴不安，尤其外電引述接近中國決策圈的消息人士話，政府內部有強大的聲音要求人民幣繼續貶值，總貶值幅度將近10%，以促進出口。人行副行長易綱話貶值10%屬無稽之談，但佢不會評論甚麼是人民幣匯率的均衡水平，只係話現在的匯率水平與中國經濟基本面比較相符。
官員否定有貶值目標，同時人仔第三日下跌，跌到呢個水平，外界相信匯價有條件基本穩定，行情有喘穩跡象，人仔匯價開始從低位彈番少少。昨日開市人仔中間價再跌1.1%至6.401元，內地盤中人仔曾跌至6.4470，但收市前急速反彈，不排除阿爺又入市干預，結果人民幣在岸價收報6.3390元，比中間價高20點子，按理今天中間價跟昨天收市價的話，會輕微上升，結束三連跌。
空間有限 投資待深跌
?家阿爺要讓人仔中間價跟上日收市價，手法同以前開口說了算不同，要干預就要用真金白銀入市干預，咁玩法難度高好多。嗒真啲人行官員的話語，既然阿爺話要用多啲市場機制，又點完全否定匯價再跌？市場估計人仔再貶的心理短期都好難消散。
按照呢個推測，唔排除人仔跌完企穩，有可能彈一彈，彈完之後，又有可能再回落試底，至能夠搵到較堅實的支持，人民幣匯價波動的因素無咁易消失，成為股市未來幾個星期的不穩定因素。
美國唔知會否推遲加息，人仔新機制形成中，備受資金流動考驗下，直至市場確信中國有能力管理新機制為止，期間大市上升空間有限。呢種環境唔係搏命的日子，短線客炒炒深跌板塊反彈可以，但考慮到回升幅度唔會好多，長線客等佢跌得深時先至撈得過。
昨日港股只係靠騰訊(700) 撐住，騰訊績優獲大行唱好，其中瑞銀指騰訊移動廣告業務潛在升幅大，重申其「買入」評級，目標價188元。股價全日高見145.5元，收市報144.1元，狂飆9.2元或6.8%，撐起恒指154點，成為今日升市的大功臣，扣除咗個市根本係要跌！
大市感覺麻麻，港交所(388) 業績又唔吸引，佢公佈業績後遭多間大行降價，其中高盛下調港股成交量預測，將其目標價由220元削至190元，維持「沽售」評級；瑞銀亦將目標下調11%至200元，同樣維持「沽售」評級。前日已急挫逾4%的港交所，昨日走勢反覆，收報205.8元，跌1.2元或0.6%。佢?家只係靠一個深港通消息吊吓命，若然守唔住203元呢啲支持位，可能有一浪下行。
陸羽仁
金融High Tea 舊文