中環在線：
周凱旋公司開發 監察新聞
PR系統幫超人分憂
超人李嘉誠最近畀新華社旗下「瞭望智庫」以《別讓李嘉誠跑了》為題撰文發炮批評，雖然篇文已經下架，但都搞到滿城風雨，引發外界唔少猜測，不過華華最近喺佢嘅公關團隊八到，超人對今次事件反應定過抬油，秘密在於佢哋內部有個監察傳媒嘅公關
（PR）系統，可以評核到每單新聞對超人嘅形象有多大影響咁話。
■trait system分析了《別讓李嘉誠跑了》，建議重視度只是2級（最高5級）。 評核對形象影響
聽聞呢個PR系統暫時叫做trait system，係由超人紅顏知己周凱旋打骰嘅維港投資開發，借用咗佢哋其中一件「玩具」Traity（一個網上聲譽平台）嘅概念，評估每宗有關長和系、超人家族嘅輿論，性質屬於正面、負面還是中性，仲會分析埋事件係透過傳統媒體，定係社交媒體發酵，非常之精密。
華華早前有機會望一望呢個將輿論數據化嘅系統，快快手影咗張相，即係圖中excel表後面嘅藍色網頁，裏面有個五角形，顯示到每單新聞會點樣影響外界對超人各方面嘅印象，例如魅力、智慧、道德等等，五角形虛線以外就係屬於正面，虛線以內就即係負面，五角形越大就越正面，十足十打機入面嘅角色能力值。
不過，呢個系統冇幫輕到超人嘅公關團隊，反而搞到一班公關要開OT，因為佢哋除咗要好似平日咁監察新聞，仲要密密填問卷，為每一篇新聞mark低-5至+5分，判斷清楚每件事係正面還是負面，要用數據說服超人。需知道超人每日都有大量相關新聞，唔怪得公關們叫曬救命。
聽聞呢個系統現階段主力係維港投資、長和（001）部份PR測試使用，希望將來全個長和系嘅公關員工都參與，齊齊幫超人填問卷做分析。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文