笑到最後：
強迫金十五年噩夢
上個星期一，本欄推介中外運（598），可惜因為本欄有一定影響力，見報開市已被搶高5%至3.99元，之後仲食咗成個禮拜驚風散，不過因為大家都知隻股NAV大約3.6元，所以跌到嗰啲位就有人接。
中外運上個禮拜五一度上番4蚊，但收市報3.89元，暫蝕2.5%。
繼續等大行出報告同埋注資消息。
最近有傳施政報告會取消被戲稱強迫金的強積金對沖機制。唔排除又係有人為咗保住自己份工，搵啲嘢嚟轉移視線，因為要取消嘅係強迫金，而非淨係取消對沖機制。
大牛市都要輸錢
一切要從強迫金初衷講起。強迫金的原意，其一係覺得市民唔會儲錢，所以政府就要逼你儲；其二係強迫金經理醒過你，所以你就要畀啲錢佢管。
強迫金之父許仕仁係個從不儲蓄嘅人，佢先使未來錢，到老來破產。當年佢搞強迫金以己度人，算係以小人之心度香港人之腹。
強迫金平均成本法買入嘅設計，係針對長期牛皮市道，一路用每月入市去令買入成本價變得平均，然後等待一次大牛市降臨，趁人家貪婪時食糊。由於強迫金假設散戶冇基金經理咁醒，所以呢個盤應由基金經理去操。
終於，今年4至5月，等到大牛市嚟，基金經理可以幫散戶做嘢，就算有基金章程要留一定比率股票或其他資產，但收得人管理費，都好應該幫到散戶賺錢離場。
就當股災係冇人預期到，至低限度，贏幅都應該夠冚輸嗰筆，至少都打和走，基金經理亦有責任贏番自己份人工，最多我哋打工仔當鬼揞眼，港股大時代冇發生過。
點知，根據理柏數據，年初至8月底，強積金總回報輸緊3.77%，以6月底強積金總資產6,201億元及256萬名打工仔計算，平均每位打工仔虧損逾9千蚊。
今年強積金令供款人出現「負儲蓄」，比起擺入零息嘅港元活期存款更不堪，當局雖然有「積金為將來」口號，客觀現實係「強積金越供越窮」。
就連七年一閏嘅大牛市，強積金都可以無功而回更加要倒蝕，我即刻諗：一、不如我自己炒好過，寧願輸喺自己手上；二、一係完全唔好炒，我儲入定期，每個月send番個結餘畀你睇冇咁嬲。
結論係，強積金連大牛市表現都咁屎，大家唔好再迷信將來強積金可以帶到乜表現畀我哋。
今次對沖機制爭議，目的只係分化社會。理性務實，強迫金冇可能完全廢除，第一步應爭取將強制性供款比例降至零，先進行止蝕，而強積金結存、對沖機制就再慢慢拆掂佢。過去15年供款，就當發咗場噩夢。
高明
即上偶像派財演高明專頁：https://www.facebook.com/bigricetea
本欄逢周一刊出
高明
笑到最後 - 高明 舊文