魚樂無窮：
仲未加息點算好
■耶倫最後決定按兵不動，維持息率不變。 資料圖片
萬眾期待嘅儲局議息會議，耶倫最後決定按兵不動，維持息率不變，美股上周四微跌，上周五則大插插，拖累夜期亦挫300點，今日港股恐怕難逃一跌。「明明息魔係股市大敵，唔加息反而大冧？點解嘅點解嘅？」
眾所周知，市場
最怕不明朗因素，美國今年加息乃市場共識，如今兌現時間卻推遲至10月甚至12月，股市今年餘下日子，繼續活在息魔陰霾下，袋住先炒波幅尚可以，要搵中長期趨勢？難矣。情況就如流血不止嘅中槍傷者，只能透過輸血維持生命，治標不治本，要完全康復，一定要做手術將子彈拎番出嚟。唔好忘記，加息與否只係市場噪音之一，A股進入殭屍mode，半死不活，無間斷拖住港股後腿，即係話，呢個傷者並非在醫院休養，而係喺槍林彈雨嘅戰場掙紮，一個唔覺意隨時又中槍，你話幾牙煙。
點樣可以逆市求存？第一，有食要食。大市上落格局不變，間中有炒作主題，捉正趨勢賺外快唔難，但唔可以貪心，否則好易短炒變長揸。第二，小注怡情。記住大浪未到，唔係all in嘅時候，捉錯方向可以輸鑊甘，用注碼控制風險，夜晚有覺好瞓。第三，善用期權。只限於大股，有蟹貨可short call，撈貨不妨short put，用期權金拉低成本，有造好造淡對象更可造long，小注博大贏！
唐牛
https://www.facebook.com/tongcow88
唐牛
魚樂無窮 - 唐牛 舊文