陸羽仁 BLOG 2015年9月4日
買股買優質
2015/09/04 09:11:40
網誌分類: 經濟
中國閱兵無大事，先看歐洲。歐洲央行昨日（週四）宣佈維持各項主要利率不變，符合市場預期。央行行長德拉吉暗示，在必要時會加大量化寬鬆(QE)。
與此同時，歐央行將歐元區今年的國內生產總值（GDP）預期由原來的增長1.5%下調至
增長1.4%，此舉令市場對歐洲加碼泵水入市場的預期升溫，消息令歐元承壓，歐元兌美元匯率下降0.8%，報1.1125美元，另一方面，刺激歐洲股市延續上日的反彈勢頭。歐股昨日平均收高2.4%，其中德國股市升2.7%，法國股市亦漲2.2%。
美股朝早跟隨歐股造好，杜指升超過150點，但科技股回軟，大市後繼乏力，逐步回順，收市只係微升23點，收報16375點；標普500指數微升2點，收報1951點%；納指跑輸大市，收市倒跌16點至4734點，跌幅0.4%。當中表現最差的是生物科技股，iShare納斯達克生物科技ETF下跌2.2%，加上蘋果公司、谷歌及Facebook等大型成份股走勢疲軟，拖累納指向下。美股9月開門不吉，杜指一度插至16002點，雖然週三週四追番超過370點(即是港股週三收市後的升幅)，但仍然係美股13年以來最差的9月份。
美股昨日衝高回落，投資者顯得比較謹慎，主要原因係美國今日將公佈8月非農就業數據。昨日，美國公佈最近一周的首次申領失業救濟人數增加至28.2萬人，較前值增加1.2萬人，這是自7月11日以來首次突破28萬人關口，另外，美國8月的Challenger裁員報告顯示，計畫裁員數目增長2.9%，遠較7月的大增125.4%為低。整體而言，美國勞動市場已非常臨近充分就業的狀態。
不過，由於美國通脹率遠未達到聯儲局的加息標準，加上外圍市場，特別係中國股市匯市仍然一片混亂，市場普遍認為聯儲局將於9月開始加息的機會不大，但呢個世界難保唔會忽然跳出隻「黑天鵝」，又或者玩「9月加完宣布今年唔再加」，在非農就業出爐前夕，投資態度顯得比較審慎，正常不過。睇股票恐懼指數VIX指數輕微回落，亦反映了市場這種小心但不至於驚慌的態度。
美股過去幾個星期，杜指跌穿上升軌，且不斷尋底，技術上已進入熊市。不過，對於美股後市，分析界又唔係一窩蜂咁悲觀。瑞銀的美國證券及衍生工具策略師Julian Emanuel昨日在CNBC節目中表示，唔相信美股牛市已死，主要原因係過去的25年，美股從未出現過一個沒有伴隨著經濟衰退的熊市，目前，無論是就業市場、房地產市場或者市場信心，都只能用經濟強勁來形容，大市又怎會出現熊市呢？佢認為投資者正在等待環境較好的時候，便會入市，由於市場憧憬明年在企業盈利好轉的情況下，經濟會更好，所以今年第四季會係入市的最好時機，Emanuel預期標普500指數年底會升上2225點。較目前仍有超過14%的上升空間。
不過，CNBC的市場技術分析師Mark Newton又唔係睇得牛，佢認為從圖表上睇，未有任何跡象，顯示沽售潮已經停止。他相信標普500指數至少要回升至2044點(即再升多4.8%)，大市最壞的情況才算過去，市場才算回復信心。目前，即使大市回升，也只是下跌中的反彈而已。佢預計標普500指數會下跌至1820點(再跌6.7%)，甚至1680點(再跌13.9%)。
而CNBC人氣節目《Mad Money》的主持人Jim Cramer昨日指出，美國投資者太容易受到中國的狀況所影響，畢竟美國人身處美國，唔係中國。佢又拿出2011年10月4日的《華爾街日報》，指出當時美股受到歐洲債務危機影響，年內已跌了17%，當日的頭條便是說美股熊市已到，但報導街後第二日，杜指卻大升153點。後來更發現，10月4日當日，美股已觸底。Cramer懷疑美股目前是否正經歷2011年的大跌市，然而，到目前為止，杜指年內只係跌咗12%，遠未到當年的17%。
Cramer 認為，現時不同於2011年，歐洲狀況良好，未來還會更好，美國又臨近總統選舉年，屆時將有更多錢湧入市場，大家唔能夠知道大市是否已觸底，或者未來仍然會大幅波動，但最好的策略仲係在大市向下的時候，買入有大折讓的優質股票。
我覺得大市走向難測，但低買優質股的建議，又永遠無錯。
陸羽仁
回應(8) 我想回應
陸羽仁 BLOG 舊文