魚樂無窮：突然增持有玄機
■散戶追蹤大戶手影，可以睇港交所權益披露。 江俊豪攝
之前講過，大跌市散戶較基金有優勢，因為散戶可以清倉離場，揸cash避險，基金卻規定有一定持貨量，遇上大跌浪只能硬食。咁做基金咪好唔著數？正所謂針冇兩頭利，散戶轉身快，但收風一定係股票市場內最慢嘅一群，聽
到嘅所謂內幕消息，肯肯定已經係第八、九手。基金相對上佔優，試想想，一間公司點解要上市？兩個字︰集資，基金正正係上市公司老闆們嘅銷售對象，所以公司最新狀況，基金一定清楚過你同我。
散戶如何彌補先天不足？最簡單直接方法，當然係每日睇港交所（388）權益披露，追蹤大戶手影，好似沉寂一輪嘅億和（838）咁，本月突然有基金連環增持，話唔定有好消息跟尾，值得優先關注。
鄧普頓4月及7月喺兩蚊樓上兩度增持億和，到咗今個月初，再以平均價1.665元掃貨，摩通緊隨其後，以平均價1.652及1.715元增持，搶貨搶到出曬面。億和中期業績表現平平，盈利倒退5%，不過業績報告講明，主打嘅模具業務，研發活動勢頭強勁，大有機會令零部件及半製成品銷售大升；由此可見，全年業績應可重拾升軌。事實上，億和現價市盈率11倍，有近3厘息墊底，估值一啲都唔貴，相信亦係基金掃貨嘅主因，待股價回至1.8元以下吸納，勝算甚高。
唐牛
https://www.facebook.com/tongcow88
唐牛
魚樂無窮 - 唐牛 舊文