笑到最後：今日買嘢等同「救國」
有好多記者行家，覺得唔應該入行做記者。高明唔係好認同，至少，有一半唔認同，特別係做報章記者。
報章記者主要功能有兩個：發問及寫作。傳媒係一個君子行業，好似加拿大準總理Justin Trudeau最近公開活動截停向記者喝倒采嘅支持者，佢話：呢個國家尊重
記者，佢哋問尖銳問題係份內事。
香港本來發展緊向呢個方向，但近年氣氛轉壞，好多人當咗發問就係批評，甚至部份股東會要好似小學生咁坐定定只准拍手稱好，否則搵保安的你走。
香港由君子國退化成小人國，唔肯回應問題就冇故可寫，所以香港記者係難撈。
另一能力係寫作。美國對沖基金經理Paul Tudor Jones最近接受彭博訪問話，佢建議所有想喺商界成功嘅人，首先報讀一個傳理報章寫作課程101。
Paul Tudor Jones解釋，報章寫作方法係先寫重點，然後一段段落去冇咁重要，佢指出，一日有九萬幾個決定，公司報告文筆好可以慳時間，而商業社會時間就是金錢，不如一開始就講重點啦。
記者能力對商業社會有用，類似嘅論調一早有人曾經講過。德國股神André Kostolany話過，證券投機者好似新聞記者咁，靠自己追蹤蒐集得來嘅新聞為生，記者撰寫新聞，投機者分析新聞，兩者分別係，記者可以出錯，投機者出錯會破產。
減息降準效力弱
高明覺得，去上堂學報章寫文呢個建議太填鴨式教育，香港人乜都報嚇course先開心，真正「香港仔性格」，應該入去打工，有錢收又有嘢學，好過畀錢出去啦！
人行減息降準，中國擦鞋友一定會話：都話「阿爺」會救市啦！
首先要冷靜落嚟。股市係無情嘅世界，市面上一啲虛假嘅「阿爺」，係唔會為咗你可以高價出貨而入市。
其次，股災教訓，中國政府嗰支魔術棒已經失效，想令個腦冷靜落嚟，應該你要問：如果減息和降準有咁神奇嘅功用，點解滬綜指到現在唔係一萬點？
其三，估計今次行動釋放6,000億元人民幣流動性，好似好多，但唔好忘記，股災救市嗰陣，無論倒幾多億元落去，大家都只會話：A股一日都過萬億元成交啦！就算全部投入股市，都唔夠一日接貨之用。
今年咁多次減息降準，翌日恒指表現，根據統計，除咗6月低開外，其他單日全數高開低收。
今日買嘢等同「救國」，但冇大紫荊勳章送，都係食嚇花生算數。
高明
即上偶像派財演高明專頁：
https://www.facebook.com/bigricetea
本欄逢周一刊出
高明
笑到最後 - 高明 舊文