笑到最後：Tesla X=iPhone4？
如果Steve Jobs係教主，教主地位又要有接班人，Tim Cook肯定接唔到班，新一代教主，而家睇嚟最似樣係Tesla創辦人Elon Musk。
淨係睇Tesla Model X個發佈會，Elon Musk出場成個Ironman咁，架S
UV出嚟嗰陣啲觀眾尖叫個反應，再睇返Tim Cook個iPhone6s發佈會，就會覺得後者好平淡，未來已經去咗Tesla度，即使Tesla仲未賺錢。Tesla Model X係SUV，發佈會全場高潮位係示範道車門。Elon Musk話道門係自動門，你行去就會自己幫你打開，到你坐低就會自動閂埋道門，佢又真係示範一次。另一個高潮位就係乘客位兩道門，係向上揭嗰隻，認真，真係幾型。但啲觀眾尖叫得最勁，係佢泊兩部七人車喺Model X隔籬，然後道門照向上開，跟住Elon Musk解釋話道門有兩個鉸位，會先升起後張開，所以有人泊喺好近嘅側邊，對「翼門」都可以向上揭起。
咁啱之後有日假期，原來係中國國慶，聽講嗰日要感動到喊，連日本秋葉原都要慶祝鄰近經濟強國嘅國慶。但高明約班朋友出嚟食飯，個個都為美帝出咗架咁有型嘅車，感動到想買，有朋友話已經落咗訂Model S，唔知佢見到部新車咁型會唔會瞓唔著、覺得訂早咗？見到大家有咁嘅反應，高明即刻聯想到iPhone4當年嘅情況。記得當年蘋果喬布斯最初出iPhone，嗰時同尹思哲兄仲係同事，佢哋幾個科技人好興奮，到3同3GS有3G同App store，加埋速度快，已經好大突破。但真正令平板手機普及係iPhone4，其實變化唔大，但好體貼用戶，金屬設計型咗、有前置鏡頭、螢幕用Retina清咗好多。幾個少改變加型咗，好似iPhone4口號話齋，「再次改變一切」（This changes everything. Again.）。
和諧汽車仲有得炒
當然，一個產品要紅可能冇咁多大道理，純粹係一般人要一啲時間去接受新事物所致。而Tesla以有型做賣點，一架80幾萬元嘅電動車，話題可以多過一架幾百萬嘅超級跑車。市場包裝之下，電動車終於廣為人接受，呢架Model X有條件令Tesla由科技圈子走入屋。
不過，同蘋果唔同，iPhone係一路賣一路賺，仲要係賺曬全行大嗰部份嘅錢；但有分析指，Tesla每賣出一部Model S，就蝕約3.1萬港元。Tesla經營手法係先攞曬個市場再諗點賺錢，股價唔係靠盈利支持，要靠市佔加幻想，即係信Elon Musk再創奇蹟。所以美股Tesla應該買一注，當贏牙骹嗰隻，一旦成功做下一隻蘋果，有買過都叫威過。美股太「離地」？和諧汽車（3836）同Tesla開展售後業務合作，目前已開業8個服務網點。少數同Tesla有關係嘅股份，最近兩日已升27.8%見4.14蚊，同大牛市高位11.76蚊仲有一大截。中國人發財，第一時間買來佬嘢，中國土豪又最需要買外國型物嚟彌補自身不足，和諧汽車仲有得炒。
高明
https://www.facebook.com/bigricetea
本欄逢周一刊出
高明
笑到最後 - 高明 舊文