一周三件：合富輝煌抵買
■合富輝煌主打一手物業代理。圖為集團主席扶偉聰。 資料圖片
內房回暖，阿爺再加碼寬鬆政策，成個板塊起哄，但內房股選擇多，而主打祖國地產代理，得合富輝煌（733），係未鬱過，PE、PB平霸！遲早萬千竉愛。
中指院指數，9月新建住宅每平方米均價連續五個月按月上升，
兼且係連續兩個月按年上升。市場睇淡內房N年，但睇數據，內房一路回穩。而阿爺亦乘勢出擊，啱啱調低非限購區首置房首期付款比率，由原先嘅30%到25%。
新業務湊大不得了
合富輝煌主打一手物業代理，廣州地區佔咗收入55%，其餘45%係非廣州區。諗到係，集團食住好似廣州呢類表現相對突出嘅內房城市，已經站穩陣腳。而阿爺新政，亦支持非廣州區樓市表現，支持合富輝煌，有張靚仔成績單。
好保守計數，兼衡量埋人仔貶值影響，集團今年全年盈利增長13%咁大把，到1.57億元，連攤薄反映，EPS0.24元，預測PE都係得8.3倍。
合富輝煌現價（2元）插到近三年低，比起上年引資祖國最大房產家居網絡平台「搜房」嘅3蚊入股價，潛水33%，得0.59倍PB。而搜房家陣trade緊5倍PB，今年預測56倍PE，另祖國行家世聯行（深002285）預測31倍PE，5倍PB；易居中國預測18.8倍PE，1倍PB。合富輝煌平霸！
又合富輝煌砌緊個「房王網」，以上邊搜房總市值233億港元睇，房王網若果成功湊大兼資本化，增值可以不得了！唔扯咁遠，齋買硬數據，煲合富輝煌，翻半番到3蚊，啱先去到搜房入股價，集團預測PE先得12倍，未有耐追到行家。
錢雋
細價股專家
本欄逢周一、三、五刊出
錢雋
一周三件 - 錢雋 舊文