金融High Tea 2015年10月6日

金融High Tea 2015年10月6日
揸?夾空軍
2015年10月06日
　　港股乘住美國就業數據差令市場猜測美國再押後減息，加上內地未開市，港股繼續反彈之旅，好友夾淡友味道甚濃。但港股未有辦法攻破兩萬二大關，恒生指數收造21854點，升348點，成交縮至759億元，睇來高位都唔係咁多人敢追貨，但又唔係高開低收，好友睇嚟未死心。

　　美國9月非農就業數據差勁，利率期貨亦顯示聯儲局今年加息機會進一步降溫，杜指上周五上演大奇蹟日，跌逾兩百點後倒轉拗腰彈番兩百點，成為港股昨日開市造好原因。

　　巨企唔會「禾稈冚珍珠」
　　如果抽空啲睇，9月份聯儲局唔加息，個市已經預咗會有一個反彈，加上喺黄金周前，中央趕推兩項措施去提振車市同樓市，畀市場多個理由夾番高啲，由咁去睇，呢幾日個市抽上來就唔出奇。前三季港股跌咗三成幾，已經有股災味道，喺超賣情況咁犀利下，反彈都可以淡死人，尤其內地仲放緊長假，大戶只係睇住外圍一瓣來炒，「揸?」容易好多。

　　股市出大夾夾事件，昨日以嘉能可(805) 暴升最搶眼。上星期佢喺外圍急跌，觸發市場憂慮佢資不抵債，擔心出現「商品界的雷曼事件」，搞到歐美股市風聲鶴唳。呢排借住佢想賣資產的消息，好友就發動反攻。昨日傳日本三井集團與新加坡主權基金GIC，計劃競購嘉能可的農業資產，該股午後曾爆升72%，隨後發通告稱不知股價上升原因，股價升勢急速放緩，全日只升18%，報12.6元，一輪過山車，充滿玩嘢味道。若在最高位追入，到收市即日已唔見31%！

　　理論上，嘉能可要賣嘢減債係預期之內，無乜驚喜。佢嘅農業資產值幾錢，完全有數得計，嘉能可唔係市值三幾億、無乜分析員公司跟進的小公司，無可能會「禾稈冚珍珠」，我上周三已在外電睇到佢會賣農業資產的新聞，所以就算賣產減低公司倒閉機會，但是否足以令股價暴升，當無事發生過呢？

　　上月尾嘉能可成翻版雷曼的傳聞吹襲，上周二股價跌到一仆一碌，見低位8.4元時，有中環茶友大歎走雞，話一早都睇淡佢股價，早先就沽空搵番筆啦。若然茶友真係有咁做，就要睇佢走唔走得切啦，因為佢講那日已是短期最低位，走得快反彈10%時認輸仲好，唔走到昨天收市價唔見咗50%。

　　沽空係大戶遊戲，一來你要睇準隻股係股價跌完仲係好貴；二來你要摸準有無大戶喺幕後操作。最經典係隻漢能薄膜發電(566) ，就出現大戶鬥大鱷嘅千億元戲碼，沽空小鱷睇死佢隻股唔值咁多錢，係咁質貨，但對家造好者亦係大鱷，股價愈質愈高，如果你無足夠子彈同膽識捱到最後，結果都可能係輸大錢收場，被逼計數離場，最後佢插到停牌都唔關你事。故此除非自認藝高人膽大，否則都係平平實實揀好股買，沽空呢類高難度遊戲，只能細細注玩，或者索性留番畀大戶玩算啦。

　　車股投資者陸續食胡
　　二、三線影業股再度成為熱炒對象，橙天嘉禾(1132) 最標青，收市大升13%，造0.7元；天馬影視(1326) 炒高11%。個市升得咁多，開始有投資者鎖定利潤，個別汽車股逆市下跌，估計未來個市可能再度進入輪流炒的狀況。內房股可以話升市力水未夠，又可以話未有大炒，若然個市續好，特別內地個市開番，或會有得炒。

　　呢排再有重磅新股上市，中國再保險集團來港招股推介，若以1.3倍市帳率定價，預計集資20億美元，下周一開始路演。另不良資產管理公司華融將於下周四進行路演，是次擬發行63.1億股股份，當中91%為新股，其餘為財政部及中糧集團出售的舊股，集資最多30億美元。

　　陸羽仁
金融High Tea 舊文