笑到最後：業主毋須驚慌
炒股票，股價明顯出現跌勢，快手沽係常識。但係講到層樓，就係另一回事。樓市出現跌勢，高明認為呢個只係正常現象，皆因稅制令樓市變成細價股，買賣排盤疏落，造就2013年後買家搶高幾格追貨，挾起個市；現時只係升市時相反，少數急住沽貨賣家劈價，代表咗整個屋苑嘅價格。同
細價股一樣，買盤疏所以挾落，只係升市時一面倒映，家陣相反發生。
樓市基本因素係就業，而失業率係3.3%，表面上未有大變。可能會有人話失業數據滯後，睇香港經濟，高明會有三個主要指標：的士佬態度、非繁忙時間塞車，同埋無謂嘢減價銷情。
三個指標反映經濟
一、的士佬崇尚自由先揸的士，好搵時，載你係恩賜。不拒載、好態度呢啲嘢，要馬死落地行先會出現。目測司機態度好咗，但拒載揀客仲係主流，在街截車都仲要等兩三架先肯去偏遠地方，隔一兩個星期警察放蛇都仲拉到揀客同兜路司機，證明經濟仍然太好，的士佬仲有選擇權。
二、繁忙時間塞車冇代表性，因為太多巴士阻路。車係奢侈品，香港路面九成目的地方，三程公共交通工具可到，非繁忙時間，以本人每日都會經過嘅紅隧嚟計，日間基本點都要超過半個鐘過海，未計過海後再塞多陣，即使晚上11點過後都仲係要塞，惟一暢通，只有淩晨3點後，先至可以4分鐘過到海。揸車嘅人都仲係好多，即係未窮到要賣車還錢。
三、終於同車無關。經濟差嘅時候，無謂嘢減價都唔會有人賣，出現劈價、無人買、執笠、業主減租嘅惡性循環。上個星期奢侈朱古力Godiva半價賣雪糕，排隊等候時間120分鐘，買唔到就上人哋facebook聲討。高明解讀為，市場大把錢，但對前景不明朗先唔使住，一有減價，覺得賣方釋出善意就撲埋去。
現時樓市跌勢，高明認為只係「挾倉」，同所有排盤疏落嘅股票冇分別，真正對基本因素考驗係加息，供樓成本上升，大家保唔保得住份工去供樓，呢個要睇加息一兩次先估到。已經做咗業主嘅人，現時冇驚慌嘅需要，因為賣咗出去，搬走要租，租金未必平得過供樓，而且年年傾租約同被業主逼走係高明最怕嘅事，經紀傭金、搬運費、爛傢俬、請假搬屋，全部都係賣樓後轉租嘅成本。一動不如一靜，儲多兩期錢供樓好過！
高明
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com