財經評論：麥記經濟邏輯
■客人到麥當勞買豬柳蛋漢堡，很多時都會加杯細汽水等邊際利潤高的產品。 資料圖片 
記者呢行經常夜收，24小時老麥成為神仙肚的目標，就算「9蚊包」加到變「10蚊包」，也是充饑的不二之選。
然而每次柯打豬柳蛋漢堡，由於
長期食蛋，恐怕加速死亡，所以每每跟老麥阿姐都要求豬柳蛋漢堡走蛋。疑問來了，這不就是豬柳漢堡嗎？同樣的師傅仔，同樣的材料，何以豬柳蛋漢堡走蛋賣10蚊，會比一模一樣的豬柳漢堡（售價12.3元）賣平2.3元？曾經類比推論，多了塊蛋賣得比無蛋平，情況像娶個有無隆胸的女人，娶個無隆的，現實與期望相符；娶個有隆的，除了日後面對期望值差異的風險，還有維修保養等突然開支。
賺取邊際利潤
拜讀高登巴打鴻文，似乎發現這是老麥另類銷售策略。引述高登巴打「淋滋滋」發表《豬柳強（蛋）潮文》，歸納5大原因為包裝成本、邊際利潤、訂貨、社會責任及經濟安定，值得一提是其邊際利潤論，提及客人買豬柳蛋漢堡時，很多時都會加細汽水、蘋果批等邊際利潤高的產品。另外一位巴位「軍事出擊」的睇法是：「豬柳漢堡個價係拎來比較，等人有錯覺以為豬柳蛋漢堡賣10蚊好平。」
事實上，麥當勞的銷售策略往往是市場學教課書的藍本，經典招數是買餐送玩具，將賣包與賣膠本末倒置，十幾廿年來都咁掂，最難忘是1998年9月一連28日，購買超值套餐加6蚊送塑膠史諾比公仔，全套128蚊的硬膠炒到近千蚊。之後的Hello Kitty，及近年與潮人合作的潮膠，依然是靠賣膠去賣包。
豬柳蛋漢堡之所以賣得比豬柳漢堡平，除了是讓消費者覺得抵食之外，實在是其邊際利潤，當我買完豬柳蛋漢堡走蛋，就似高登巴打所言，不其然會柯打多杯5蚊的細可樂，心理上15蚊買了個餐好似好抵，卻原來轉角到街口士多，一罐330毫升的可樂也不過是5蚊，呢5蚊我寧願畀小商戶賺。
記者：陳家雄
財經評論 舊文
來源 source: http://hk.apple.nextmedia.com