笑到最後：
應用「聖誕賣年糕」炒股
2016年會變成點，高明真係答你唔到，所以今年無辦法做預言。不過，有一啲趨勢已經發生緊，未來只會加劇，呢個都好肯定，而呢個趨勢就係鬥早。
由好耐之前，酒樓開始賣實貨年糕、月餅，之後賣糕、餅券預售等等，因為競爭太劇烈，最後幾乎演變到聖誕賣年糕券、過年賣
糭券、端午賣月餅券，所有嘢都係提前發生，預先抽乾你嘅購買力。就算係投資界亦都係，譬如大行報告，10月尾至11月已經陸續推出，即使乖乖哋12月公佈，其實啲客一早已經睇曬。
大家慌死遲咗做會執輸，造就啲嘢早過大家意料發生。而按照呢種模式去執行炒股策略，家陣嘅部署係應該著眼於「兩會」。
係呀，你冇睇錯，今年兩會雖然料3月3日先開始，但所謂「聖誕賣年糕」，扣埋2月的3日年假，家陣只得不足兩個月交易時間，家陣買定，已經唔算太早，只可以話啱啱好。
金山軟件食正國策
中國經濟越改革越頹，2015年保唔保到七已經冇關係，2016年隨時要作個「超新常態」、「更新常態」呢啲口號，因為可能要「保六」。2015年炒股票救經濟失敗，最終可能都係要攬番住個互聯網，例如2015年兩會李克強就講過「制定互聯網+行動計劃，推動移動互聯網、雲計算、大數據、物聯網等與現代製造業結合，促進電子商務、工業互聯網和互聯網金融健康發展」。而且經濟冇起色，今年可能吹得更大，憧憬更加大。
所有具中國特色嘅概念，喺事前炒，係冇問題的。要買中互聯網+同埋雲計算，不如揀金山軟件（3888）。金山近年積極拓展金山雲業務，2014年12月提出「All in Cloud」戰略，承諾未來3年投入10億美元發展雲業務。估計將會食正國策憧憬，錢途無限，一時三刻炒嚇應該冇問題。
高明唔會預期全個市場都會提早炒兩會，因為大家計算唔同，但係最有可能就係，嚟緊兩個月內，市場突然有一刻覺得，「係喎，係時候炒番兩會概念喎」，到嗰時，就係金山炒上之時，亦係提前炒兩會人士落車之時。所以，今日推介嘅金山唔會有目標價或止蝕價，反而會設定一個限期，就係最遲喺2月底前落車，避過兩會開幕好消息出貨一刻。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com