中環在線：
遊說收藏家拍賣古董名畫
何超盈都要食檸檬
■何超盈自小學習西洋畫，佢身後就係讀書時嘅作品。 李潤芳攝 
賭王嘅25歲女兒何超盈肯定係生活無憂嘅富二代，平時多數喺娛樂版見佢悉心打扮出席品牌活動，應該唔使點做。但原來佢都想
證明自己有存在價值，大學畢業後一直希望發展個人事業，直至舊年初去保利香港拍賣做實習，萌生合作念頭，下半年成立保利澳門，本月10日喺澳門首度舉行拍賣會。
保利澳門首席執行官何超盈為籌備呢場拍賣會，過去數月跟保利同事四出拜訪收藏家，遊說對方拿出珍藏去拍賣，最終有150件拍賣品，包括珠寶、古董、名畫，拍賣會將於澳門麗景灣酒店舉行。
■林風眠 《湖濱秋色》 1958年作 估價：380萬至480萬元 
■村上隆 《自己心中的小人物》 2010年作 估價：750萬至950萬元 
包括林風眠 村上隆作品
何超盈特別提到林風眠一幅《湖濱秋色》與村上隆嘅《自己心中的小人物》，前者係佢飛去台灣拜訪一位收藏家，對方抽半小時聽佢講解公司成立目的，然後拿出呢幅珍藏以示支持；至於村上隆嘅作品，就係佢舊年去深圳參與政協會議時，即場遊說身旁一位大藏家而得來。
咪以為賭王千金一定有優勢，何超盈畢竟只得25歲，別人收藏名畫古董幾十年，正如何超盈自己所講：「你有錢，人哋都有錢！」其間有唔少收藏家請佢食檸檬，讓佢明白到「唔好以為屋企名氣實幫到手，原來一山還有一山高」，佢仲要提醒自己，食完檸檬就要盡快平復心情，以免黑口黑面走去見下一個收藏家。
何超盈仲話，雖然贏在起跑線，但以後嘅路要自己尋求，「我都想證明自己有存在價值」。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com