魚樂無窮：滙控升到你唔信
■唔理黑貓定白貓，捉到老鼠就係好貓；同樣不論藍籌定細價股，識得升就係好股。 資料圖片
鄧小平講過，不管黑貓白貓，捉到老鼠就係好貓。股場亦然，藍籌國企基金細價股，識得升就係好股。唐牛鍾情中小股，但見到大嘢有勢，一樣唔會放過，今日推介更係超級巨無霸滙控（005）。
「嘩，升咗好多喇喎，點買得落手呀？」正所謂高處未算高，你睇股王騰訊（700）就知，何況滙控賣點多到嚇死人，買番少少傍身，有你著數。
賣點一︰見底味濃。眾所周知，滙控𠵱家幾乎日日回購，8月至今累計用咗18億銀，不及預計動用金額195億銀嘅一成，但效果立竿見影。
賣點二︰高息誘人。管理層講明不減派息，現價股息率仲有7厘，好似漆黑中嘅熒火蟲一樣咁鮮明，咁出眾！
賣點三︰買盤積極。邊個買緊？第一，大媽。翻查港股通數據，滙控近日經常打入三甲，淨買入數以億計，噚日仲有多達10億元狂掃，非常誇張。第二，長倉基金。近年滙控遭唾棄，唔少基金零持倉甚至沽空，如今醜股大翻身，反手造好是常識吧。第三，對沖基金。平息借錢買高息滙控，財息兼收。
目標價幾多？用股息率計，去年全年派息3.98元，6厘息的話即係66.3元，潛在升幅15%，最低要求也！
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com