財金冒險號：內銀盈利靠造數
■中行業績與同業相似，唯獨減值與眾不同，實在有「造數」之嫌。 資料圖片
上星期講到，內銀股業績應該隻隻都咁上下，唔使睇。但小生人在缸湖，身不由己，都係要逐份望一望。一路睇，一路打喊露，以為睇緊韓國選美，千人一臉。五大國有銀行果然都係淨利息收入跌、息差收窄
、資產減值增加、盈利增長1%左右，只有中行（3988）例外，上半年賺930億元，升2.5%，跑贏其他國有銀行，因為賣咗南洋商業銀行，有290億人仔入賬。
心水清嘅讀者，一睇就知如果冇賣南商，中行盈利咪要倒退近三成？咁又唔係喎，我肯定結果盈利都係增長1%左右，只要改一改資產減值粒數。中行上半年資產減值損失大升75%，抵銷曬賣南商嘅特別收益。其他國有銀行嘅減值損失只上升一成到兩成幾，農行（1288）更加減少咗，點解中行減值特別多？除咗造數，我諗唔到其他原因。
呢度講嘅「造數」，雖然合法，因銀行對壞賬分類、減值、撥備等處理向來有彈性，但中行份業績樣樣似同業，惟獨減值與眾不同，好明顯各大內銀都係先定咗盈利，至決定做幾多減值。
咁搞法，難怪投資者近5年都唔信內銀盤數。表面上，市盈率5倍，平到笑，但估值嘅嘢，如果無得向上重估，幾平都冇用。較實在嘅股息，仲有5厘幾，但中行畀大家睇到，壞賬減值其實要做多好多，盈利下跌壓力大，未來保唔保得住5厘股息，唔多樂觀。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com