操盤手劄記：金山軟件等「雲」到
■雷軍任主席的金山軟件前景睇雲服務，不過雲服務發展需時。 資料圖片
深港通前日敲定11月中下旬通車，港股乘機炒一轉。喺內地力拓互聯網+，加上蘋果放風7日發佈iPhone7，科技股炒上。騰訊（700）持有8.2%嘅金山軟件（3888）亦再惹憧憬。曾幾何
時，金軟比騰訊更燦眼！2013年科網熱潮，騰訊升六成，金軟升2.6倍！
金軟老闆雷軍，同騰訊素有淵源。雷軍2011年回歸金軟，接任主席，翌日騰訊即宣佈入股15.68%，成為單一大股東。騰訊入股後，金軟由3元一路殺上30元。2013年4月，騰訊減持2.5%，雷軍接貨後持股增至14.9%，成為大股東。2015年1月，雷軍嘅小米科技向騰訊收購2.98%金軟，喺微博話：「此舉表達了我個人及小米對金山雲服務戰略的強烈信心。」金軟做大雲服務市場，睇嚟背後考慮係為小米生態鏈服務。小米2010年4月6日成立，2011年發佈第一款手機，2015年小米、華為、蘋果為中國三大智能手機廠商，但根據最新市場調查數據，小米失落國產手機老大寶座，被華為、OPPO、vivo拋離。小米成敗，正繫於金軟嘅雲服務策略。
記得雷軍跟董明珠嘅「10億元賭局」嗎？2013年12月12日晚上，喺中國經濟年度人物頒獎禮上，格力老闆董明珠、小米老闆雷軍獲獎，兩人就發展模式激辯，雷軍豪言「五年之內，營業額擊敗格力」，引發呢場傳統與新興產業較量嘅賭局。孰贏孰輸，拭目以待。
金軟日前派中期成績表，轉蝕6.7億元人民幣，主要係投資美國上市嘅迅雷及世紀互聯股價大跌，作出減值撥備所致，但呢兩項係戰略投資，唔影響主業。期內收入按年增47%至35.2億元人民幣；拆開嚟睇，雲服務、辦公室軟件等收益增1.2倍至4.8億元人民幣。
金軟股價8月起回升，10天線先後升穿20天線、50天線，昨日更升穿100天線，收15.86元。公佈業績後，野村、瑞信上調投資評級及目標價，拉動股價抽升，一度升上16元，有望再破位。要留意嘅係，金軟前景要睇雲服務，而雲服務發展需時。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com