智取大市：市場睇小加息殺傷力
■美國加息因素遠遠未反映喺股市之上。 資料圖片
近年環球超低息周期，對於股市起嘅正面作用，比起QE更大。
先講超低息近年對於股市帶嚟嘅效應。唔少美國企業，一邊大破慳囊派高息，一邊舉債投資。在於企業角度，管理層相信投資回報必然高於超低息，唔keep現金然後積
極舉債，先係運用資金嘅最有效率方法；在於股東而言，亦樂於收取現金股息；在資本市場角度，作為股票投資者，股票係投資渠道嘅不二之選，收到巨額股息，最大可能回流入去股市，再推高股價。而企業派高息嘅趨勢，獲得投資者肯定，相關股份嘅股價表現理想，再令更多企業仿傚。上述因素夾埋上嚟，對股市（尤其美股）嘅振奮作用，絕不簡單。
對於現金流（主要中資股）遠遜於美國企業嘅香港上市公司而言，上述派高息同時舉債嘅處理資金模式，冇咁流行。港鐵（066）同華置（127）近期都試過派大額特別息，其後股價表現理想。
大家目前仍能接受一年加息一次嘅密度，如果速度更快，就等於剎停上述嘅派高息、舉債模式，對於股市而言，冇咗企業派高息而持續產生嘅資金流入，形成股市資金流緊縮，慢性負面影響將會相當長遠。所以，千祈唔好認為美國加息因素早已反映喺股市之上，事實上係遠遠未反映。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com