貼地風管 - 鄭發 2019年1月28日
貼地風管：專家恐怖過恐怖分子 - 鄭發
英國監管機構九月已發信給主要銀行及保險公司，要佢哋在2021年底時要由LIBOR過度到其他利率基準。 資料圖片 適中字型 較大字型
LIBOR（倫敦銀行同業拆進利率）是影響全球370萬億美元金融合約的利率基準。好似空氣咁，無咗佢真係瓜得！LIBOR reform其實好大鑊，但完全得不到應有的關注。
簡單介紹，英國監管機構九月已發信給主要銀行及保險公司，要佢哋在2021年底時要由LIBOR過度到其他利率基準。我堅信，如果2021年底LIBOR真係無咗，後果會比2008年環球金融風暴更恐怖。英美專家似乎真係想消滅LIBOR，有時專家真係恐怖過恐怖分子！
我試嚇講隻故仔，讓讀者感受LIBOR reform 係乜東東。下文「空氣」指 LIBOR、「安氣」指 Secured Overnight Financing Rate、「科學家」是金融機構/組織、「專家小組」我唔好意思開名、「拉波星人」是市民大眾。
拉波星的空氣受汙染，鷹、尾兩大國領導其他國家成立專家小組，研究如何化解災難。專家小組認為受汙染的空氣會損害健康，他們發明了一種新的安全氣體（安氣），聲稱能代替空氣，讓拉波星人健康呼吸。其他科學家非常擔心：安氣怎可能代替空氣？就算可以，又怎可能有足夠安氣讓拉波星人使用？
科學家的疑慮有理：安氣嘅含氧量比空氣少好多，要吸得好急速，而且安氣要透過好多拉波星人使用才能不斷循環製造。問題是拉波星人仍在呼吸空氣，又唔知安氣係乜，所以唔肯改吸安氣，無人肯用就唔會有足夠嘅安氣。專家小組嚴厲警告，話空氣好快會在星球上消失，要求所有科學家制定應變措施，即使三年後空氣絕跡都可以順利過渡！專家嘅蠱惑邏輯是：科學家要用三年時間逼令所有拉波星人轉用安氣，唔准用空氣，到時自然無問題！
科學家驚到震，心諗點逼拉波星人轉用安氣？點可能停用空氣？到時無足夠安氣，又或者發現安氣原來唔work就闔家安好？科學家哀求專家小組：「空氣汙染雖然嚴重，但唔死得人，繼續用多陣得唔得？」點知專家小組鬧爆，鬧科學家太依賴空氣、太無道德、太無危機感。
專家小組和科學家都將個問題講到超複雜，拉波星人根本無人有興趣了解，唯有當無聽過，但叫佢哋轉用安氣就睬你都傻。
三年又三年，如果專家小組繼續扮改良安氣、科學家繼續扮準備應變、拉波星人繼續呼吸空氣，呢套係浪費時間和金錢嘅笑片。但如果專家小組變態到2021年消滅空氣，咁就係災難片！
鄭發
本欄逢周一刊出
貼地風管 - 鄭發 舊文
來源 source: http://hk.finance.appledaily.com