【大茶飯】跟進兩隻私有化股（青冰）
上個月有兩間公司宣佈私有化，分別是合和(0054)及哈爾濱電氣(1133)，兩股近日都有了新的發展，又不妨update大家一下。
青冰寫哈爾濱電氣，重點就是阿爺的私有化近年係十戰十勝，由於公佈私有化時係十二月底，當時市況慘淡，所以距私有化價格4.56元
，一度有15%的折讓，到之後企穩了，都長期企在4蚊樓下任買，換言之仍有逾12%空間。
按上市條例，通函須於通告公佈後21日內寄出，但無論是全購、私有化、注資或賣資產等等，都好少會在這限期前搞得掂，所以通常都會延遲寄發通函，限期是一至兩個月不等，有些仲會delay幾次，今次哈爾濱電氣就在1月14日公佈，要延至2月22日前才寄發。當大家（包括青冰）認為delay一個月，應該冇咁快鬱啦，點知16號股價突然創新高，八天內由4元升至4.26元，升幅6.5%，你可能會話：「唓，幾個巴仙有乜咁大驚小怪呀？」但留意頂位係4.56元，咁樣一鬱，已經差不多係一半潛在升幅，用另一個角度講，市場預計成功率已經大增了。至於上星期五公司發盈警，都好正常吖，如果呢個時候出個大盈喜，股東仲會唔會贊成你私有化呢？
至於合和，星期四的交易披露通告中，看到長和旗下的公司，申報增持了十幾萬股，現持有0.1010%股本，即約87萬股。點解要申報呢？因為該公司屬於一致行動人士定義中的第(1)類別，暫時唔好深究這個第(1)類別是甚麼，反而睇嚇誠哥出手的動機。
但凡這些私有化，都係得贊成同反對兩面，雖然早年有人話誠哥同胡生在生意上有分歧，霍大班更加開過口發炮，但以誠哥的江湖地位，點會在這個關鍵時候做這些無聊嘢，實在有失身份，正所謂要搞你都用橫手啦，仲去申報咩，所以這個增持舉動可理解為支持喇。再睇清楚個披露，在增持前都係揸76萬股，換言之一直都持有，唔增持就不會有這個披露，所以就代表係有心將行動浮面的。
星期五合和股價當然升啦，畀面誠哥嘛，但如果係胡生搵誠哥幫手的話，證明在票數上，似乎仲未數得夠，否則不會出此下策，通函寄出日亦已延至2月28日，就睇嚇誠哥只是象徵性出一次手，還是仲有後著吧。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com