經濟客飯 - 曾國平 2019年3月29日
經濟客飯：MPF自願供款扣稅攻略 - 曾國平
強積金自願供款及延期年金產品扣稅方案上周在立法會通過，將於下星期實施，不過大部份打工仔好似未聽過。 資料圖片 適中字型 較大字型
強積金（MPF）自願供款及延期年金產品扣稅方案上周在立法會通過，將於下星期實施。據報道，方案推出無聲無息，大部份香港市民從未聽過。
今日我就客串扮演「理財專家」，為大家計計到底在乜嘢情況下自願多供強積金有著數。是咁的，成條數其實決定於三個數字：距離提取年齡65歲有幾多年、薪俸稅率（嚴格講係邊際稅率）、唔買強積金自己投資可以慳幾多手續費。即係話，如果你知道第二、三個數字，就可以計得出你應該邊年開始自願供款。為求簡化，我冇計入政府派糖增加免稅額的機會，亦冇考慮手緊等錢使的流動性需求。
例如薪俸稅率17%，同一個類型基金（例如追縱恒指）自由市場買同用強積金買每年手續費相差1%，就可以計到你46歲或以上的話，自願供款著數過交稅自己投資，相反你未夠46歲的話，強積金手續費太沉重，就算有扣稅都係唔夠著數。照咁講大部份市民未聽過新政策好合理，一來後生冇興趣，二來大部份唔使交或交好少稅的市民亦事不關己，真正要知的只有上年紀的中高收入人士。
另一個推論，係將來強積金制度成功進一步壓低手續費的話，就會有越來越多後生自願供款。例如手續費距離減到0.5%，劃界年齡就會由46歲大跌到26歲。
曾國平
美國維珍尼亞理工大學經濟系副教授
http://fb.com/economics3.0/
本欄逢周五刊出
經濟客飯 - 曾國平 舊文
來源 source: http://hk.finance.appledaily.com